Танлов натижаларига кўра, Адлия вазирлиги “Ўзбекистон – 2030” стратегиясини амалга ошириш бўйича энг намунали вазирлик номинациясида ғолиб деб топилди.
Қайд этилишича, вазирлик қисқа вақт ичида замонавий, очиқ ва рақамли адлия институтига айланган. Бугунги кунда 30 та платформа орқали 380 та тўлиқ рақамлаштирилган хизмат кўрсатилмоқда, 780 дан ортиқ хизматдан онлайн фойдаланиш имконияти яратилган. Шунингдек, 208 та давлат хизматлари марказидан иборат тармоқ бутун мамлакат бўйлаб ягона стандарт асосида фаолият юритмоқда.
Тоғ-кон саноати ва геология вазирлиги ресурсларни бошқариш бўйича энг намунали вазирлик сифатида эътироф этилди. Идора фаолиятида шаффофлик, тежамкорлик ва самарадорликни оширишга алоҳида эътибор қаратилгани таъкидланди. Маълумотларга кўра, ажратилган маблағлар янги конларни қидириш ва соҳани ривожлантиришга йўналтирилган, геология-қидирув ишларида сув сарфи 20 фоизга қисқартирилган. Шунингдек, асосий кончилик ускуналарини маҳаллийлаштириш даражаси 84 фоизга етказилган.
Давлат хизматларини кўрсатиш йўналишида эса Ички ишлар вазирлиги энг намунали идора сифатида тан олинди.
Бугунги кунда вазирлик томонидан 60 га яқин хизмат тури кўрсатилмоқда, уларнинг 95 фоизи тўлиқ рақамли шаклга ўтказилган. Илгари тарқоқ бўлган 72 та маълумотлар базаси ягона “Хавфсиз шаҳар” тизимига интеграция қилинган бўлиб, унга 14 та бошқарув маркази ва 20 дан ортиқ вазирлик уланган. Ўтган йили 148 мингдан ортиқ маъмурий иш масофавий тартибда кўриб чиқилиб, фуқароларнинг идорама-идора сарсон бўлишининг олди олинган.
