"Ал-Наср” Роналду билан илк бор Саудия чемпиони бўлди.
41 ёшли ҳужумчи “Ал-Наср” сафидаги илк расмий совринини қўлга киритди. Португалиялик юлдуз жамоаси билан Саудия Арабистони чемпионатида ғолиб бўлди ва бу ғалаба футболчи учун жуда ҳиссий кечди.
21 май куни “Ал-Наср” чемпионат аутсайдерларидан бири — “Дамак”га қарши майдонга тушди. Роналду дубль қайд этиб, жамоасининг 4:1 ҳисобидаги ғалабасига катта ҳисса қўшди. Шунингдек, у икки йил деганда жаримадан тўғридан тўғри гол урди.
Бу голлардан кейин Роналдунинг фаолиятидаги голлари сони 972 тага етди. У ҳозир ҳам 1000 голлик марра сари ҳаракат қилмоқда.
Учрашувдан кейин португалиялик футболчи кўз ёшларини яшира олмади. У захирага олинаётганда ҳам, финал ҳуштагидан кейин ҳам ҳиссиётларга берилди. Роналду барабан чалиб, мухлислар билан машҳур “Siu” байрамини нишонлади.
Тақдирлаш маросимида у бошига клуб рўмолини боғлаган ҳолда майдонга чиқди. Кейин эса орзудаги кубокни боши узра кўтарди.
Шу тариқа, Роналду тўртинчи уринишда Саудия чемпионлигини қўлга киритди.
Маълумот учун, бу “Ал-Наср” тарихидаги 11-чемпионлик бўлса, Роналду фаолиятидаги 8-лига ғалабаси бўлди. У аввал Англияда, Испанияда ва Италияда ҳам чемпионликни қўлга киритган.
