АҚШнинг Ўзбекистондаги элчиси Памела Спратлен Китоб шаҳридаги Қашқадарё вилоят сил касаллиги шифохонаси шифокор ва ҳамширалари билан учрашди.
Элчи Спратлен хоним ушбу вилоятда жойлашган силга қарши кураш муассаларига олти ой ичида иккинчи марта ташриф буюрмоқда. У жорий йилнинг 24 март куни Бутунжаҳон Силга қарши кураш кунида Қаршидаги Минтақавий сил диспансерига ташриф буюрган эди.
2015 йилдан буён USAID Ўзбекистон Республикаси соғлиқни сақлаш вазирлиги ва Фтизиатрия ва пульмонология бўйича ихтисослашган республика илмий-амалий тиббиёт марказининг сил тарқалишининг олдини олишда олиб бораётган саъй-ҳаракатларини қўллаб-қувватлаб келмоқда. Ўзбекистоннинг тўрт вилоятида иш олиб бораётган USAID сил тарқалишининг олдини олиш, даволашга қаратилган хизматлардан кенг фойдаланиш ҳамда уларнинг сифатини ошириш борасида ёрдам бериб келмоқда.
USAID Ўзбекистонда Миллий силга қарши кураш дастури доирасида, хусусан, кам таъминланган аҳолига касалликнинг олдини олиш, ташхис қўйиш ва даволашда кўмаклашади. Ушбу дастур беш йилга мўлжалланган бўлиб, унинг умумий бюджети 7,6 миллион АҚШ доллари миқдоридадир. Дастурнинг асосий мақсади мамлакатда сил касаллиги оқибатларини камайтириш ва силнинг кўплаб дориларга турғун шакллари ривожланишининг олдини олишдан иборат. Дастур кенг кўламли тиббий масалаларни, жумладан соғлиқни сақлаш соҳасининг инсоний ва институционал потенциалини ривожлантириш, ташкилотлараро ҳамкорлик ва координацияни мустаҳкамлаш ҳамда кенг оммага силга ташхис қўйиш ва даволаниш имкониятларидан фойдаланишни янада осонлаштириш каби масалаларни ўз ичига олади.
