Агар ишлаш ёки ўқиш учун чет эл давлатларига кетаётган бўлсангиз, шартнома СИЗга тушунарли тилда тузилаётганини назорат қилинг. Унда сизнинг иш ёки ўқиш жойингиз, шарт-шароит, яшаш манзилингиз ва иш вақтингиз аниқ кўрсатиб ўтилган бўлсин.
Шахсингизни тасдиқловчи ҳужжатларингиз ва паспортингиз ҳар доим ёнингизда бўлсин. Паспортингизни ҳеч кимга берманг!
Оила аъзоларингиз ва дўстларингизга чет давлатдаги манзил ва телефон рақамларингиз ҳақида тўлиқ маълумотларни, паспортингиз ва шартнома нусхаларини қолдиринг.
Ўзингиз кетаётган хорижий давлатдаги Ўзбекистон Республикасининг элчихонаси ва консуллик ваколатхоналарининг телефон рақамларини кетишингиздан олдин аниқланг.
Агар сиз қийин аҳволга тушиб қолсангиз, албатта, яқинларингиз билан боғланишга ҳаракат қилинг ва улардан ҳуқуқни муҳофаза қилувчи мутасадди органларга мурожаат қилишларини сўранг.
Агар паспортингизни Ўзбекистон Республикаси ҳудудидан ташқарида йўқотиб қўйган бўлсангиз, шахсингизни тасдиқловчи ҳужжатни олиш учун ушбу давлатдаги Ўзбекистон Республикаси элчихонаси ва консуллик ваколатхоналарига мурожаат қилинг.
Ҳеч қачон давлат ҳудудларини сохта ёки қалбаки ҳужжатлар билан кесиб ўтманг!
Хорижий давлатнинг ҳудудида бўлишингиз муддати визада кўрсатилган. Унга амал қилинг. Виза тизимини бузсангиз, сизни жиноий жавобгарликка тортишлари ва ушбу давлатга кейинги киришингиз таъқиқлаб қуйилиши мумкин.
Сиз ишлаш учун борган чет давлатда ҳуқуқингиз бузилаётган, инсонийлик қадр-қийматингиз камситилаётган ёки хавфсизлигингизга таҳдид қилинаётган бўлса, шу каби ҳолатларга тушиб қолган чет эл фуқароларига ёрдам кўрсатувчи халқаро ва нодавлат ташкилотларга мурожаат қилинг.
Манба: “SUG‘DIYONA” газетаси
