Қурбон ҳайити байрами муносабати билан маҳаллий авиақатновлар сони оширилади. Бу ҳақда Транспорт вазирлиги ахборот хизмати хабар берди.
Қурбон ҳайити арафасида Тошкентдан Бухоро, Термиз, Урганч ва Нукус йўналишларига яна 28 та қўшимча авиарейс ташкил этилади.
25–31 май кунлари Uzbekistan Airways, Silk Avia ва Centrum Air авиакомпаниялари томонидан амалга ошириладиган қўшимча қатновлар орқали қарийб 9 минг йўловчи манзилига етказилиши режалаштирилган.
Шунингдек, байрам кунлари йўловчилар оқими ошгани сабаб Тошкент автовокзалидан ҳам қўшимча 55 та автобус рейси йўлга қўйилган.
