Хитойнинг Қўшма Штатлардаги элчиси Цуй Тянькай ХХР ва АҚШ ўртасидаги савдо зиддиятига муносабат билдирди.
“Савдо уруши нафақат Хитой ва АҚШ муносабатларининг умумий атмосферасини заҳарлаб, икки мамлакат ўртасидаги ўзаро ишончнинг бузилишига сабаб бўлади, балки дунё иқтисодиёти равнақига ҳам салбий таъсир қилади” деган Цуй Тянькай.
Шу билан бирга элчи ХХР ҳар қандай савдо урушига қаршилиги, зиддиятни музокара йўли билан ечиш тарафдори эканлиги, аммо, АҚШ бундан кейин ҳам савдо урушида ташаббус кўрсатса, Хитой унга муносиб жавоб беришини таъкидлаган.
Эслатиб ўтамиз, аввалроқ АҚШ ўз маҳсулотларининг интелектуал ҳуқуқлари Пекин томонидан бузилаётганини рўкач қилиб, Хитойнинг 1,3 минг номдаги товарига импорт божлар миқдорини оширди. Шу йўл билан Вашингтон Хитой билан кўп миллиардлик савдо дефицитини камайтиришга эришмоқчи. Бундан ташқари АҚШ Президенти Хитой маҳсулотларининг импорт божлари миқдорини 100 миллиард долларга ошириш имкониятларини аниқлаш бўйича кўрсатма берди. Бунга жавобан Хитой Давлат кенгаши Американинг 106 номдаги маҳсулотига 25 фоизлик импорт божини киритиш бўйича қарор қабул қилди. Мазкур ҳужжат Вашингтон томонидан Хитойнинг бошқа маҳсулотларига ҳам янги божлар қўйилиши эълон қилиниши билан кучга киради. Яқинда эса Дональд Трамп Хитой маҳсулотлари импорт божларининг йиллик миқдори 150 миллиард долларга чиқиши мумкинлигидан огоҳлантирди. Пекин галдаги таҳдидга яраша жавоб бўлишини, савдо зиддиятида охиригача курашишини маълум қилган.
