Аввал хабар берганимиздек, 16-21 сентябрь кунлари “Марказ – 2019” йирик масштабдаги стратегик қўмондонлик-штаб ўқувлари ўтказилади.
Машқларда етти мамлакат – Россия, Қозоғистон, Хитой, Покистон, Тожикистон, Қирғизистон ва Ўзбекистоннинг ҳарбий контингенти қантнашади.
Машқларнинг биринчи босқичида Ўзбекистон Республикасининг Наманган вилоятида жойлашган “Ғурумсарой” полигонида Ўзбекистон ва Тожикистон Мудофаа вазирлиги ҳарбий хизматчилари “Марказ – 2019” йирик масштабдаги стратегик қўмондонлик-штаб ўқувлари доирасида ҳамкорликдаги қўшма машғулотларни ўтказади.
Беш кун давом этадиган машғулотларда Тожикистон Қуролли Кучларидан икки юзга яқин ҳарбий хизматчи иштирок этади, шунингдек, Ўзбекистон Мудофаа вазирлигининг бир қатор бўлинмалари ва ҳарбий бошқарув органларининг ҳарбий хизматчилари қатнашиши кўзда тутилган.
Наманган вилоятининг тўрли ҳудудларида ўтказиладиган машғулотлар давомида шартли террорчилар йўқ қилиниши режалаштирилган.
Ўқув машғулотларининг иккинчи босқичида эса Ўзбекистон ва Тожикистон Қуролли Кучлари ҳарбий контингенти ҳамкорликдаги ҳаракатларини Россия Федерациясининг Оренбург вилоятида жойлашган “Донгуз” полигонида амалда қўллаши режалаштирилган.
Эслатиб ўтамиз, Ўзбекистон ва Тожикистон ҳарбий хизматчилари ҳамкорликда 2018 йилнинг 18-22 сентябрь кунлари Тожикистоннинг “Чоррух-Дайрон” ўқув маркази ва “Нурафшон” полигонида ҳам ҳамкорликда машғулотлар ўтказилган эди.
Мудофаа вазирлиги Ахборот ва оммавий коммуникациялар департаменти
