Khan Academy O’zbek - Ўзбекистондаги илк оммавий бепул онлайн таълим платформасининг очилиш маросими бўлиб ўтмоқда. Бу ҳақда ҳуқушунос-блогер Хушнудбек Худойбердиев хабар берган.
“Бугун, Ўзбекистонда илм соҳасидаги тарихий кунлардан бири. Бепул мустақил таълим олиш бўйича дунёдаги энг катта платформалардан бири - Khan Academy - бир гуруҳ фидойи юртдошларимиз томонидан ўзбек тилига таржима қилинмоқда. Бу жуда катта фойдали, савобли ҳамда машаққатли иш.
www.xanakademiyasi.uz орқали ёшларимиз онлайн видеодарсларни кўриб, ўз билимларини оширишлари мумкин.
Тўғри, интернетда фойдали контент жуда кўп. Исталган фан бўйича бемалол уйда ўтириб, мустақил ва мукаммал билим олиш мумкин. Аммо улар хорижий тилларда. Ўзбек тилида эса, минг афсуски, фойдали манбалар жуда ғариб.
Менимча, Khan Academy O’zbek лойиҳаси ўзбек тилига давлат тили мақоми берилганининг 30 йиллик байрамига энг катта совға бўлди.
Ушбу лойиҳа яна бир томондан жуда қувонарли. Мазкур лойиҳа ташаббускор фуқаролар томонидан амалга оширилди, унга мингга яқин инсонлар ўз хайриялари билан улуш қўшишди. Яъни ушбу йирик лойиҳа муаллифлари давлат эмас, жамият - сизу биз! “Давлат бизга нима қилиб берди, фалон нарсани давлат қилсин” деган мафкура ёпишиб қолган бир замонда, фуқароларнинг ўзи ҳам биргалашиб йирик лойиҳалар қила олиши мумкинлигини исботлаб бергани учун ҳам хурсандман. Ҳақиқий фуқаролик жамиятининг асосий белгиси ҳам шу аслида.”
Маълум бўлишича, лойиҳага ҳиссасини қўшмоқчи бўлганлар @khanacademyuzbek каналига аъзо бўлиши Payme ёки Click тизимлари орқали хайрия қилиши ҳам мумкин.
Лойиҳага ўқитувчи ёки таржимон сифатида ёрдам бериш имконияти ҳам бор: https://t.me/khanacademyuzbek/203 (https://t.me/khanacademyuzbek/203)
Khan Academy амалий машқларни, ўқув видеороликларини ва ўқувчилар ўзларига мос тезликда ўқишини таъминлаб берувчи панелни таклиф этади. Платформа математика, илм-фан, компьютерда дастурлаш, билогия, кимё, физика, санъат, иқтисодиёт ва бошқа кўплаб йўналишлар бўйича контент тақдим қилади. Khan Academy'нинг асосий вазифаси бу ўқувчини бошланғич математикадан олий фанларгача бўлган ўқиш жараёнида йўналтириб туришдир, бунда у ўқувчининг кучли ва заиф тарафларини аниқлаб берувчи замонавий ва содда технологиялардан фойдаланади. Бундан ташқари, платформа НАСА, замонавий санъат музейи, Калофорния илм-фан академияси ва Массачусетс технология институтлари билан ҳамкорликда ишлайди ва улар томонидан тақдим қилинган махсус контентдан фойдаланади.
