Кеча Швециянинг Стокгольм шаҳрида 2019 йил учун халқаро Нобель мукофоти совриндорларини тантанали равишда тақдирлаш маросими бўлиб ўтди.
Лауреатларга фахрий дипломлар ва олтин медалларни шахсан Швеция қироли Карл ХVI Густавнинг ўзи тақдим этди. У тантанада қироллик хонадонининг бошқа аъзолари билан иштирок этган.
Жорий йилда физиология ва тиббиёт йўналишидаги мукофот билан америкалик олимлар Уильям Кэлин ва Грегг Семенц ҳамда британиялик Питер Рэтклиффлар тақдирланишди. Физика соҳасида олтин медал ва дипломга канадалик Жеймс Пиблз, швейцариялик олим Мишел Майор ва Дидье Кело муносиб кўрилди. Америкалик Жон Гудинаф, британиялик Стэнли Уиттингем ва япониялик Акира Ёсинолар кимё соҳасида халқаро Нобель мукофоти совриндорлари бўлди.
Тантанали маросимда адабиёт йўналишида ҳам халқаро Нобель мукофоти совриндорларининг номи эълон қилинди. Мукофотлар 2019 йил учун австриялик ёзувчи Петер Хандка ва 2018 йил учун польшалик адиба Ольга Токарчукка насиб этди. Иқтисодиёт бўйича Ҳиндистон-Америка тадқиқотчиси Абхижит Банержи, франциялик аёл Эстер Дюфло ҳамда америкалик Майкл Кремерлар совриндор бўлди.
Шу куни Осло ратушаси биносида тинчлик бўйича халқаро Нобель мукофотининг эгаси ҳам эълон қилинди. Бу йил тинчлик учун энг кўп курашган шахс Эфиопия бош вазири Абий Аҳмед Али бўлиб чиқди.
