Аввал хабар берганимиздек, бугун, 25 декабрда Ўзбекистон Республикаси Бош прокуратурасида Соғлиқни сақлаш вазирлиги тизимида коррупция ҳолатлари ҳамда уларни келтириб чиқараётган шарт-шароитларни муҳокама қилишга бағишланган Корруацияга қарши курашиш бўйича республика идоралараро комиссиясининг йиғилиши бўлиб ўтди...
Ниғматулла ЙЎЛДОШЕВ, Ўзбекистон Республикаси Бош прокурори:
— Ногиронлиги бўлган шахсларни тиббий кўрикдан ўтказиш ва тиббий реабилитация ишлари ҳам талабга жавоб бермайди.
Ногиронлик аломатлари яққол кўриниб турган ҳамда нохуш клиник ташхисга эга фуқароларга ногиронликни белгилашда бюрократик ва коррупцион тўсиқлар яратилганлиги ҳам бор ҳақиқат.
Масалан, алоҳида анатомик нуқсонлар, яъни қўл, оёғи ампутация қилинганлар, болаликдан туғма ногиронлар, даун касаллигига чалинганлар ногиронликни олиш учун, эътибор беринг, 4 ойдан 6 ойгача беҳуда даволанишга мажбур бўлмоқда.
Биргина мисол, Янгиариқ туманида 1994 йилда туғилган, болаликдан қовурғалари туғма деформация бўлганлиги боис, ногиронлиги яққол кўриниб турган фуқаро Д. ногиронлик гуруҳини олиш мақсадида 2019 йил март ойидан 4 ой - ю 20 кун фақат расмиятчилик учун шифохонада ётишга мажбур бўлган.
Республика бўйича ногиронлиги бўлган шахслар 615 мингдан ортиқбўлсада, тиббий-меҳнат экспертизасини тўлақонли ўтказиш, уларни ижтимоий ва касбий реабилитация қилиш учун реабилитология ва эрготерапия мутахассислари йўқ.
Энг аянчлиси, ногиронлик билан туғилган ёки ногирон бўлиб қолган фуқаролар ҳам ногиронликни расмийлаштиришда тамагирликка дуч келмоқда.
Масалан, Каттақўрғон шаҳар тиббий маслаҳат комиссияси раиси 2-гуруҳ ногирони Т.га умрбод ногиронликни белгилаб бериш эвазига ундан 1,5 млн. сўм пора олганда ушланган.
Садоқат АЛЛАБЕРГАНОВА
