Аввал хабар қилганимиздек жорий йилнинг 18 январь куни Тошкент шаҳар М.Улуғбек туманида сурхондарёлик ҳайдовчи “Спарк” автомашинаси билан хизмат олиб бораётган ЙПХ инспекторларини қасддан уриб кетганди. Шунингдек, ҳайдовчи инспекторларни уриб юбориб, воқеа жойидан яширинган эди. Айни пайтда мазкур ҳолат юзасидан ИИВ ЙҲХББ қўшимча маълумот берди.
Келтирилишича, М.Улуғбек тумани прокуратураси томонидан “2020 йил 18 январь куни Ш. Диллаев туман ҳудудида жиноятчиликни олдини олиш, ҳуқуқбузарликка қарши курашиш, ҳаракат хавфсизлигини таъминлаш ва жамоат тартибини сақлаш учун ўз хизмат вазифасини олиб бораётган ЙПХ инспекторларининг тўхташ тўғрисидаги қонуний талабига бўйсунмасдан бошқарувидаги транспорт воситаси билан ходимларни қасддан уриб юбориб воқеа жойидан яширинган ҳолат юзасидан” жорий йилнинг 22 январь куни фуқаро Ш. Диллаевга нисбатан Ўзбекистон Республикаси Жиноят Кодексининг 219-моддаси 1 қисми билан жиноят иши қўзғатилди.
Ҳозирда унга нисбатан эҳтиёт чораси сифатида қамоққа олиш қўлланилган, дея маълум қилди ИИВ ЙҲХББ Ахборот хизмати.
