Самарқандлик Муқимжон Орипов бир неча йиллардан буён атрофдагиларга ўзи ўстирган хонаки гулларни улашиб келади. У Самарқандни гуллар шаҳрига айлантиришга астойдил бел боғлаган. Бу ҳақда Газета.уз хабар берди.
Муқимжон Орипов шаҳардаги 39-мактабга 14 минг дона япон гуллари уруғи ва 330 та наврўзгул хонаки гулини тақдим этди. Шунингдек бу мактабга яна 15 минг дона гул пиёзлари экилган гултуваклар ҳадя этди.
Булардан ташқари ўтган йилларда Тойлоқ туманидаги мактабларга ҳам минглаб хонаки гуллар етказиб берган.
Муқимжон аканинг хонадонида мактабларга аталган беминнат туҳфалари учун келган миннатдорлик мактублари тўлиб кетган.
Ҳақиқий меҳнатсевар, табиатни жону дилдан севувчи инсон Муқимжон Орипов ҳозирда 67 ёшда. У ўз қўли билан етиштирган ранг-баранг гулларни мактабларга бепул улашяпти.
Отахон 16 йилдан буён гулчилик билан шуғулланиб келаётган бўлса, шу давр ичида 500 минг туп гул кўчатларини беминнат улашиб, каттаю кичикнинг ҳурматига сазовор бўлган.
