Ижтимоий тармоқлар ва турли мессенжлардаги қатор пост ва нашрларда Тошкент метросининг Сергели ер усти линияси, ҳамда пойтахт ҳалқа метро линияси қурилиш майдончаларидан олинган бир қатор фотосуратлар жамоатчиликни ташвишга солмоқда.
Мазкур нашрлар ва фотоматериаллар "Ўзбекистон темир йўллари" AЖнинг қурилиш соҳасидаги малакали мутахассислари томонидан диққат билан ўрганиб чиқилиб, ушбу масалага ойдинлик киритилганлигини маълум қилиб, муносабат билдирган ҳамюртларимизнинг ўз фуқаролик позициясининг ифодаси ва бефарқ эмасликлари учун самимий миннатдорлик изҳор этди.
“Aлбатта, ҳар бир инсон ўз юртида бунёд қилинаётган иншоотларнинг ишончли бўлишига хайрихоҳлик билдириб, уларнинг сифат даражасидан хавотирланиши табиий, деб ўйлаймиз. Лекин шуни алоҳида қайд этиш лозимки, Ўзбекистон Республикаси худудидаги ҳар бир қурилиш объектининг сифати устидан давлат, идоравий, муаллифлик ва жамоатчилик назоратининг кўп босқичли тизими мавжуд бўлиб, ҳар бир қурилиш майдончаларида назорат қилувчи идоралар вакилларининг ташрифи ва улар томонидан амалга оширилаётган текширув натижалари тегишли ҳужжатлар, жумладан, фото ва видео материаллар, шунингдек, электрон шаклда расмийлаштирилади. Муайян камчиликлар аниқланган тақдирда уларни бартараф этиш учун тегишли чоралар кўрилади.
Жонкуяр жамоатчилик вакилининг фото материалларида қайд этилган шарҳларга келсак, мутахассисларимиз қуйидагиларни маълум қилади:
- Фотосуратлардаги асосий эътирозли шарҳлар таянч устунлари ва улар устидан ўрнатилган ригелларнинг бирлашган жойида кўзга ташланиб турган тирқиш. Қурилиш-монтаж ишларини бажариш техник қоидаларига кўра бундай ҳолат табиийдир. Чунки қаралаётган оралиқдаги тўсинлар ўрнатилаётганида ҳамда таянч ригелини унинг устуни устига монтаж қилинаётганида, таянчлар сатҳларининг, лойиҳада кўзда тутилган, ўзгариб бориши таъсирида оралиқ қурилма тўсини ўз ўрнатилаётган ригел юзасига бир текис ётмаслиги оқибатидир. Бироқ, яна бир бор эслатиб ўтамизки, бундай ҳолат лойиҳада кўзда тутилади;
- Жаҳон қурилиш тажрибасидан маълумки, бундай ҳолатни бартараф қилиш учун қум-сементли майин қоришма ёрдамида бундай тириқишлар пардозлов ишлари мобайнида тўлдириб, бартараф этилади. Ушбу муолажа таянчлар, ригеллар ёки темирбетон тўсинларнинг юк кўтариш қобилиятига, ҳамда устиворлигига таъсир қилмайди. Ўз навбатида бундай ҳолатлар қурилаётган иншооатнинг сифатсиз ёки ишга яроқли, яроқсизлигини англатмайди;
- Ижтимоий тармоқларда тарқалган суръатлар қурилиш жараёнида тасвирга олинган. Суратларда акс эттирилган дарзлар зўриқишли ҳолат таъсирида вужудга келмаган бўлиб, асосан қурилиш-монтаж ишларини амалга ошириш жараёнида пайдо бўлади ва одатда якунловчи ишларини бажариш вақтида бартараф қилинади. Объектни ишга туширишдан олдин, барча тузилмаларни, шу жумладан барча таянчларни, устунлар ҳамда бошқа юк кўтарувчи конструкцияларни синчковлик билан ўрганиб чиқилади” — дея расмий ихоҳ берилган.
ЭСЛAТМA: Қурилаётган ер усти метро йўлининг ишончлилиги тўғрисида, қурувчилик ихтисослигига эга бўлмаган баъзи шахсларнинг шошқалоқлик билан қилган фикрларидан хавотирда бўлаёган юртдошларимизни ишонтириб айтамизки, қурилиш ишлари, ушбу турдаги ишларга мос келадиган, мазкур соҳанинг етук експертлари кўригидан ўтган, ҳамда ўрнатилган тартибда муҳокама қилиниб тасдиқланган қурилиш меъёрлари ва талабларига мувофиқ равишда олиб борилмоқда. Шу боис, қандайдир шубҳаланишга тушиб, хавотирланишга ҳеч қандай ҳожат йўқ. Ушбу лойиҳани амалга оширувчи “Кўприкқурилиш” трести УК мамлакатимизда ва чет элларда автомобил ва темир йўл кўприклари, транспорт тоннеллари ва транспортга оид бошқа турдаги сунъий иншоотларини қуриш соҳасида етакчи корхона ҳисобланади. "Кўприкқурилиш" трести УК қуруқликда ҳам, сувда ҳам бундай ишларни бажариш учун зарур бўлган замонавий техника ва технологияларга эга. Мисол қилиб айтадиган бўлсак, пойтахтда қурилган деярли барча кўприклар ва йўл ўтказгичлар, айнан мазкур корхона мутахассисларининг меҳнати билан амалга оширилиб келинмоқда. Темир йўл қурувчилари мураккаб ишларни амалга оширишда керак бўладиган ускуналар ва темирбетон конструкцияларни трестга қарашли корхоналарда ишлаб чиқарадилар. Бундан ташқари, Ўзбекистонлик машинасозларнинг ёрдами билан "Текнолог" илмий ишлаб чиқариш бирлашмаси томонидан тайёрланган бурғулаш ускуналаридан фойдаланиб, мураккаб гидрогеологик шароитларда кўприк ва йўл ўтказгичлар қуриш ишларини муваффақиятли амалга ошириб келмоқдалар.
Таъкидлаш керакки, корхонага Ўзбекистон Республикаси Вазирлар Маҳкамаси томонидан йўллар, темир йўл кўприклари, йўл ўтказгичлари, тоннеллар ва транспортга оид бошқа сунъий иншоотларни қуриш бўйича қурилиш-монтаж ишларини олиб бориш учун лицензия берилган, дея қўшимча қилган Жамиятнинг Aхборот-таҳлилий медиа маркази
