Янги Зеландия ҳукумати томонидан ижарага олинган Air New Zealand авиакомпаниясига тегишли самолёт Хитойнинг коронавирус ўчоғи ҳисобланган Ухань шаҳридан 190 кишини олиб келди. Бу ҳақда Stuff нашри хабарига асосланиб Дарё маълум қилди.
Самолёт 5 февраль куни эрталаб соат 06:45 да Ухандан парвоз қилган ва кечқурун соат 18:00 ларда Янги Зеландиянинг Окленд шаҳрига қўнган.
Ҳаво кемаси бортида Янги Зеландия фуқароларидан ташқари яна бир нечта мамлакат фуқароси бўлган.
Хусусан, йўловчилар орасида Папуа-Янги Гвинеядан (17 киши), Тимор-Лештидан (17 киши), Самоадан (5), Тонгадан (4), Фижидан (2) киши ва Кирибати, Микронезия федерал штатлари, Ўзбекистон ва Нидерландия фуқаролари борлиги айтилмоқда. Шунингдек самолёт бортида саккиз нафар британиялик бўлган.
Эвакуация қилинган фуқароларнинг барчаси 14 кун давомида Шимолий Окленднинг Вангапараоа ярим оролидаги ҳарбий объектда карантинда сақланади.
Қайд этилишича, рейсга чипта брон қилган 60 киши парвоз вақтида аэропортга келмаган. Бир неча фуқаро Янги Зеландияга қайтишдан бош тортган.
Бир нафар фуқарода парвозга қадар тиббий текширувда касаллик аломатлари аниқлангани учун у рейсга қўйилмаган.
