UniRank агентлиги жаҳон университетлари ва коллежларининг онлайн таниқлилиги ва алоқаларнинг онлайн мавжудлиги бўйича рейтинг эълон қилди. Унда юртимиздаги 85 та ОТМ ўрин олган. Унга кўра, Ўзбекистон миқёсида 1-ўринни ЎзМУ (дунё миқёсида 3971-ўрин), 2-ўринни ТПТИ Нукус филиали (дунё миқёсида 6365-ўрин) ва 3-ўринни СамДТИ (дунё миқёсида 7834-ўрин) эгаллаган. Бу ҳақда Давлат тест маркази хабар бермоқда.
Ушбу рейтинг фақатгина чет эллик талабалар ва ўқитувчиларга ОТМнинг бошқа давлатда сайт орқали қанчалик машҳурлигини тушунишларига ёрдам бериш учун мўлжалланган.
Таъкидлаш жоизки, ушбу ташкилот рейтингининг бошқа нуфузли агентликлар рейтингидан фарқли томони ОТМларнинг таълим сифати, академик хизматлари, ўқув ва илмий фаолият асосий мезонлар сифатида қабул қилинмаган.
Маълумки дунё университетларининг рейтингини аниқлаш бўйича THE (Times Higher Education), QS (Quacquarelli Symonds), ARWU (Academic Ranking of World Universities) каби нуфузли агентликлар асосий эътиборни илмий фаолиятга қаратишади. Яъни 72% илмий фаолиятга, 16% ўқув жараёнига ва 12% бошқа йўналишларга эътибор қаратилади.
Вазирлар Маҳкамаси ҳузуридаги Таълим сифатини назорат қилиш давлат инспекцияси томонидан нуфузли рейтинг агентликлари услубларини ўрганган ҳолда, 23 та энг муҳим индикатор танлаб олинган. Ушбу мезонлар асосида 2018-2019 йилларда 57 та ОТМ фаолияти таҳлил қилиниб, натижалар эълон қилинган эди. 2019-2020 йиллардаги натижа бўйича ҳозирда ўрганиш жараёнлари кетмоқда.
Эслатиб ўтамиз, Ўзбекистон Республикаси олий таълим тизимини 2030 йилгача ривожлантириш концепциясида республикамиздаги камида 10 та ОТМни халқаро эътироф этилган ташкилотлар рейтингида биринчи 1000 талик рўйхатга, шу жумладан ЎзМУ ва СамДУни биринчи 500талик рўйхатга киритиш белгиланган.
