Россиялик хоккей юлдузлари: "Ўзбекистон келгусида албатта хоккей чўққисига эришади" (фото)

СПОРТ 18.02.2020, 19:57
Теглар: хоккей, Россия, Тошкент
Россиялик хоккей юлдузлари: "Ўзбекистон келгусида албатта хоккей чўққисига эришади" (фото)

 

 

Бугунги кунда юртимизда қишки спорт турларини ривожлантиришга алоҳида эътибор қаратилмоқда. Шу билан бирга профессионал спортдаги ғалабаларимиз салмоғини ошириш ва бу жараёнда қишки спорт турлари, айниқса хоккейни ёшлар ўртасида кенг тарғиб қилишга жиддий аҳамият берилмоқда.

“Ўзбекистон Республикасида қишки спорт турларини янада ривожлантириш чора-тадбирлари тўғрисида”ги Президент Қарори эса мамлакатимизда қишки спорт турларини ривожлантиришда янги даврни бошлаб берди. Мазкур қарорнинг муҳим бандларидан бири – қишки спорт турлари бўйича чет элдан таклиф қилинаётган мутахассисларнинг хизмат уйлари билан таъминланишидир.  

“Хумо Арена” кўп тармоқли муз саройининг очилиш маросимида Президентимиз Шавкат Мирзиёев россиялик хоккей юлдузларига пойтахтимиздан уй-жой бериш таклифини берганди. "Токи улар Тошкентга меҳмон бўлиб эмас, балки ўз уйига келгандек келишсин”, деганди.

Шу муносабат билан Тошкентга россиялик хоккей афсоналари таклиф этилди. Республикамизнинг спорт жонкуярлари, жумладан Хоккей федерацияси вакиллари иштирок этган тантанали тадбирда хоккей юлдузлари Валерий Каменский, Александр Якушев, Виталий Прохоров ва Алексей Жамновларга Тошкент шаҳрида қурилаётган квартираларнинг калити топширилди.

Кейин "Хумо" муз саройида россиялик чемпион хоккейчилар ва ўзбекистонлик ОАВ вакиллари иштирокида пресс конференция ўтказилди.

Матбуот анжуманини Александр Малишев очди. Кейин бошқаларга сўз навбатини берди.

 

–Бизга бўлган эътибордан бошимиз кўкка етди. Шу билан бирга бу сизнинг хоккей ветеранларига бўлган ҳурматингиз, бизни унутмаганингиздан далолат бериб турибди. Келгусида сизнинг ҳам юлдузларингиз хоккей чўққисига чиқиши ва ўз мухлисларини хурсанд қиладиган ўйинлар кўрсатиши тилакдошимиз, – деди В.Каменский.

Виталий Прохоров эса Ўзбекистонга бир неча марта келгани, охирги марта келганда муз саройида машқ қилаётган болаларни кўргани, аммо улар ҳали жуда бетартиб ҳаракат қилаётгани, музда кўп йиқилишгани, лекин олти ойдан сўнг саройнинг очилишида уларнинг анча нарса ўрганганини кўриб севинганини айтди. 

"Шундай тиришқоқ болалар ва жонкуяр тренерлар бор экан, ўзбек хоккейи тез орада яхши натижаларга эришади, – деди В.Прохоров.

Тадбирда афсонавий хоккейчилар журналистларнинг бир қатор саволларига жавоб беришди. Ўзларига билдирилган ишонч ва эҳтиромдан боши кўкка етгани, бундай воқеа уларнинг ҳаётида илк маротаба юз берганини таъкидлашди. Бунинг учун ҳукуматимиздан миннатдор эканини билдиришди.

Шарҳлар

Об-ҳаво: Тошкент
Валюта курси
1