Жорий йилнинг 18 март куни Фармацевтика тармоғини ривожлантириш агентлигида тиббий буюмлар ва гигиеник воситалар ишлаб чиқарувчи корхоналар раҳбарлари, текстиль саноати вакиллари ва дистрибюторлар билан кенгайтирилган йиғилиш бўлиб ўтди.
Унда Фармацевтика тармоғини ривожлантириш агентлиги директори Сардор Кариев коронавирус пандемиясининг тарқалиши билан боғлиқ вазият борасида сўз юритиб, касалликка қарши кураш бўйича кўрилаётган чора-тадбирларни янада кучайтириш зарурлигини айтиб ўтди. Бунда, ҳимоя ниқобларини ишлаб чиқаришга ихтисослашган корхоналар ишлаб чиқаришни янада кучайтириш билан бирга уларнинг сифатига ҳам эътибор қаратиш зарурлиги таъкидланди.
Аҳолининг ҳимоя ниқобларига бўлган эҳтиёжини қондириш мақсадида, йиғилишда иштирок этган тиббий буюмлар ишлаб чиқарувчи корхона раҳбарлари,текстиль саноати вакиллари ва дистрибюторлар ўзаро ҳамкорликда иш олиб боришга келишиб олишди.
Таъкидлаш жоизки, Ўзбекистонда тиббий буюмлар, айнан тиббиёт ва гигиеник юз ниқобларини ишлаб чиқарувчи 20 та корхона мавжуд. Шунингдек, мамлакатимизда респиратор ишлаб чиқарувчи корхоналар ҳам мавжуд бўлиб, уларнинг барчасида ишлаб чиқариш қуввати кучайтирилган ва узлуксиз тартибда ишлаб турибди.
Шунингдек, ишлаб чиқаришга қўшимча равишда текстиль корхоналар ҳам докадан қатламли гигиеник ниқобларни ишлаб чиқаришни йўлга қўйган.
“Ўзтекстилсаноат” уюшмасига аъзо корхоналар уч турдаги ҳимоя ниқобларининг ишлаб чиқарилишини кунига 2 миллион донага етказмоқда.
Соғлиқни сақлаш вазирлиги буйруғига биноан, тиббиёт ниқоблари тиббий буюмлар рўйхатига киритилган эди. Ҳозирда, тиббиёт ниқобларини ушбу рўйхатдан чиқариш бўйича мазкур буйруққа ўзгартириш киритилмоқда. Мақсад ҳимоя ниқобларини ишлаб чиқариш жараёнини соддалаштириш ва ишлаб чиқаришни янада ошириш.
Тиббиёт халатлари (комбинезон) ишлаб чиқарувчи корхоналар сони 4 та бўлиб, ҳозирда улар кунига 7 минг дона комбинезонлар ишлаб чиқармоқда. Ушбу корхоналарнинг ишлаб чиқариш қуввати кунига 18 минг дона. Айни дамда ушбу маҳсулотга эҳтиёж ортгани туфайли, яқин кунларда улар тўла қувватда ишлай бошлайди.
