Германия ҳукумати коронавирус тарқалишига қарши кураш чораларини кескинлаштирди. Бу ҳақда Германия канцлери Ангела Меркель 22 март, якшанба куни, маълум қилди.
Хусусан, фуқароларга иккитадан ортиқ кишидан иборат гуруҳ бўлиб тўпланиш тақиқланди. Фақат бир оила аъзолари ва умумий уй хўжалиги билан шуғулланувчилар бундан мустасно. Ҳукумат шахсий алоқаларни камайтиришни ва жамоат жойларида бир-биридан масофа сақлашни тавсия қилмоқда. Ушбу тақиқ яқин 2 ҳафта давомида амалда бўлади, унинг ижросини таъминлашни полиция назорат қилади. Шунингдек, ресторанлар ва сартарошхоналарни ҳам вақтинча ёпишга қарор қилинган.
Германия COVID-19 пандемиясидан энг кўп зарар кўрган 5 та мамлакатдан биридир. Жонс Хопкинс университети маълумотларига кўра, мамлакатда коронавирусдан қарийб 24 минг киши касалланган, 92 нафари вафот этган.
