Эронда коронавируснинг олдини олиш учун метил спирти ичиб 300 нафар фуқаро вафот этди ва мингдан ошиқ киши заҳарланди. Бу ҳақда CentralAsia хабар берди.
Эронда метанол коронавируснинг олдини олиши ва беморларни тузатиши ҳақидаги ёлғон хабарлар тарқалмоқда. Улар Британиянинг Daily Mail нашри берган фейк хабарга асосланган ҳолда тарқатилмоқда.
Шу сабабли кўплаб эронликлар вирусни енгиш умидида таркибида метанол бўлган кимёвий воситалар – антифриз, суюлтиргич (растворитель) ва автомобил ёнилғиси қабул қила бошлашган. Бу эса юзлаб қурбонларга ва минглаб одамларнинг жиддий заҳарланишига олиб келган. Бу воситани қабул қилиш оқибатида юзлаб одамлар кўр бўлиб қолаётгани айтилмоқда.
Ҳатто 5 яшар бемор болага ҳам ота-онаси интернетдаги фейк хабарларга ишониб метил спирти ичиришган. Бола бунинг оқибатида кўр бўлиб қолган. Бугунги кунда Эронда коронавирусдан ўлганлар 300 дан ошиқ бўлса, метил спиртидан ўлганлар 1000 дан ошиб кетганлиги қайд этилмоқда. Шу боис эронлик шифокорлар турли нотўғри маълумотлар асосида касалликни даволашга уринмасликни маслаҳат беришмоқда.
Эслатиб ўтамиз: 10 мл метанолнинг (метил спирти) ичга қабул қилиниши оғир заҳарланишга, 80-150 мл эса ўлимга олиб келади. Заҳарланиш бир неча соат ичида авж олади.
Метанолдан заҳарланишнинг энг енгил шакли бош оғриғи, ҳолсизлик, кўнгил айнаш ва қайт қилиш билан кечади. Организмда метанол заҳарли бирикма - формальдегидгача оксидланади. Метил спирти ҳид ва таъм бўйича истеъмол учун қўлланадиган этил спиртидан фарқ қилмайди. Ундан заҳарланишда антидот сифатида этил спирти қўлланади.
