Бугун 18 май кунидан Ўзбекистонда маҳаллий йўналишларда авиа ва темир йўл қатновларига рухсат бериш бўйича вақтинчалик тартиби эълон қилинди.
Мазкур тартибга мувофиқ авиа ва темир йўл хизматидан фойдаланиш истагида бўлган йўловчилардан коронавирус инфекциясига тест топширгани, таҳлил олинганига 120 соатдан кам бўлмаган, манфий таҳлилли маълумотнома талаб қилинади.
Бугунги кунда Наманган шаҳрида аэропорт ва темир йўл вокзали, Поп туманида темир йўл вокзали фаолият олиб бормоқда.
Шу муносабат билан Наманган вилоят СЭОМ бош врачи, Рустамжон Ҳамрақулов юқоридаги хизматлардан фойдаланмоқчи бўлганларга тартибларни эслатиб ўтди.
Унга кўра
"Энг аввало Наманган шаҳар ва Поп тумани санитария-эпидемиологик осойишталик марказларига мурожаат этинг. Бу марказларда Соғлиқни сақлаш вазирлиги ҳузуридаги Санитария-эпидемиологик осойишталик агентлигининг 2020 йил 16 майдаги № 74-Ф сонли буйруғига асосан коронавирус инфекцияси таҳлили учун 224 минг 415 сўм миқдорида пуллик хизмат кўрсатилади ва 24 соат давомида маълумотнома ёзиб берилади. Ушбу маълумотномасиз онлайн орқали чипта харид қилишга рухсат берилмайди.
Аэропорт ва вокзалларда йўловчиларнинг тана ҳарорати ўлчанади. Ҳарорати 37 даражадан юқори бўлмаган йўловчилар дезинфекторлар ёрдамида зарарсизлантирилади. Бир марталик ҳимоя ниқоби ва қўлқопларда транспортга чиқарилади. Юқори ҳароратдаги йўловчиларга аэропорт ва темир йўл хизматидан фойдаланишга рухсат берилмайди.
Йўловчилар аэропорт ва темир йўл вокзалларида ижтимоий масофани сақлаган ҳолда, йўналтирувчи махсус тасмалар бўйлаб ҳаракатланиши шарт. Умумий овқатланиш, хизмат кўрстаиш ва савдо шахобчаларининг фоалият юритишига йўл қўйилмайди.
Қатнов вақтида самолёт салонида ёки вагонлар бўйлаб харакатланиш таъқиқланади. Манзилга етгунча бир марталик ҳимоя ниқоблари ва қўлқопларни ечишга руҳсат берилмайди, ҳожатхона ҳамда тамбурларда тўпланишга йўл қўйилмайди," дейилади Наманган вилоят СЭОМ бош врачи томонидан берилган маълумотда.
