Жорий йилнинг 21 май куни соат 17:10 ларда, Навоий вилояти, Учқудуқ туманидан Зарафшон шаҳри йўналиши бўйича бир нафар йўловчи билан ҳаракатланиб келаётган “Лабо” русумли 85 866 ТАА давлат рақам белгили транспорт воситаси “Учқудуқ” тўсиқ постида хизмат олиб бораётган Миллий Гвардия ходимлари томонидан дизенфекция чораларини кўриш мақсадида тўхтатилиб, ҳайдовчидан транспорт воситасини қайд этиш гувоҳномасини тақдим этиши, ушбу маълумотлар постда юритилаётган журналга қайд этилишини маълум қилишган.
Шунда, ҳайдовчи Милий Гвардия ходимларига ушбу постдан ҳар куни ўтиб қайтишини, ҳар сафар ҳужжатларини кўрсатмаслигини айтиб, улар билан тортишиб турган вақтида, ушбу постга хизматга жалб этилган Учқудуқ туман ИИБ ЙҲХГ маъмурий амалиёт инспектори А.Умаржонов постда жойлашган хизмат хонасидан чиқиб келиб, ҳолатга аралашиб ҳайдовчидан ҳужжатларини тақдим этишини сўраган.
Ҳайдовчи унга ҳужжатлари йўқлигини маълум қилганидан сўнг, ЙПХ ходими А.Умаржонов уни автомашинадан тушишини, автомашинаси эса жарима майдонига қўйилишини айтган.
Ҳайдовчи автомашинадан тушганидан сўнг А.Умаржонов унга тегишли автомашинани жарима майдонига қўйиш мақсадида рул бошқарувига ўтирган вақтида автомашинада ўтирган йўловчи ходимнинг ҳаракатларини видеотасвирга олишни бошлаб, ходимга нима сабабдан бодикамерасиз хизмат олиб бораётганлигини айтиб, турли важлар келтириб, уни ҳаракатларини ижтимоий тармоқларга жойлаштиришини маълум қилган ва уларни қўйиб юборишини сўраган.
Шу вақт ходим уни видеотасвирга олишига қаршилик кўрсатмоқчи бўлган. Шундан сўнг, А.Умаржонов томонидан ушбу транспорт воситаси ҳайдовчиси А.К.га нисбатан Ўзбекистон Республикаси Мамурий жавобгарлик тўғрисидаги Кодекснинг 194 ва 135-моддаларига кўра баённома расмийлаштирилиб, автомашинаси эвакуатор ёрдамида жарима майдонига қўйилган.
Шу куни А.Умаржонов хизматга чиқишидан олдин бодикамерасини навбатчилик қисмидан олган бўлсада, ушбу ҳолат содир бўлган вақтда у бодикамерасини шу постда жойлашган хизмат хонасида унутиб қолдирган.
Мазкур ҳолат юзасидан Навоий вилояти ИИБ ЙҲХБ масъул ходимлари томонидан хизмат текшируви ўтказилди. Бу ҳақда ИИВ ЙҲХББ Ахборот хизмати хабар берди.
Хизмат текшируви хулосасига кўра, Ўзбекистон Республикаси Вазирлар Маҳкамасининг 2018 йил 1 декабрь кунидаги 975-сон қарори талабларига риоя қилмаган Навоий вилояти, Учқудуқ тумани ИИБ ЙҲХГ МА инспектори А.Умаржоновга “Қаттиқ ҳайфсан” эълон қилинди.
Шунингдек, Учқудуқ тумани ИИБ ЙҲХГ МА инспектори А.Умаржонов томонидан ҳайдовчи А.Каримовга нисбатан Ўзбекистон Республикаси Маъмурий жавобгарлик тўғрисидаги Кодекснинг 135, 194-моддалари тартибида расмийлаштирилган маъмурий баённома ва тўпланган ҳужжатлар кўриб чиқишлик учун Учқудуқ тумани Маъмурий судига юборилиши белгиланди.
