Россия мудофаа вазирлиги COVID-19га қарши вакцинани клиник синовдан ўтказиш учун 50 нафар кўнгиллини танлаб олди. Бу ҳақда ҳарбий муассасага таянган ҳолда Россия оммавий ахборот воситалари хабар берди, дея ёзди ЎзА.
Бу ерда гап Россия Мудофаа вазирлигининг 48-Марказий илмий-тадқиқот институти томонидан яратилган вакцина ҳақида бормоқда. Кўнгиллиларнинг биринчи гуруҳи институтга бугун – 3 июнь куни етиб келади.
Россия мудофаа вазирлигининг коронавирусга қарши вакцина ишлаб чиқишда иштироки борасида апрель ойи бошларида маълум қилинган эди. Ўшанда эҳтимолий вакцинанинг клиниккача бўлган тадқиқотлари 1 июнда якунланади, дея маълум қилган эди. Вакцинанинг клиник тадқиқоти июль охирларида якунланиши кутилмоқда.
22 май куни РФА академиги Александр Гинсбургнинг хабар қилишича, марказ ходимлари ўзларида SARS-CoV-2 коронавирусга қарши вакцинани синаб кўрган. Улардан ҳеч бирида ёмон таъсир қайд қилинмади, «ҳамма тирик, соғ саломат ва хурсанд», деди Гинсбург.
