Балиқчида электр ҳисоблагичидаги камчиликларни расмийлаштирмаслик эвазига фуқародан 400 АҚШ доллари талаб қилган фирибгар ушланди. Бу ҳақда "Даракчи"га Бош прокуратура Матбуот хизмати маълум қилди.
Бош прокуратура ҳузуридаги Департаментнинг Андижон вилояти бошқармаси томонидан ўтказилган тезкор тадбирда, фуқаро А.Ш. Балиқчи туманида яшовчи фуқаро С.С.дан фирибгарлик йўли билан пул ундираётгани аниқланди.
А.Ш. С.С.дан уйида электр тармоқлари корхонаси ходимлари томонидан ўтказилган назорат текширувида аниқланган камчиликлар бўйича 40 млн сўм атрофида жарима тўлаши кераклигини айтиб, ушбу ҳолат бўйича баённома туздирмаслик эвазига 400 АҚШ доллари талаб қилган. Шундан, 1 млн сўм ва 300 АҚШ долларини олган вақтида ашёвий далил билан ушланган.
Мазкур ҳолат юзасидан А.Ш.га нисбатан Жиноят кодексининг 168-моддаси 1-қисми билан жиноят иши қўзғатилиб, тергов ҳаракатлари ўтказилмоқда.
