Сирдарё тумани «Тараққиёт» маҳалла фуқаролар йиғинида яшовчи 97 ёшли Рабза момо Шодиёрованинг шу пайтгача шахсини тасдиқловчи ҳеч қандай ҳужжати йўқлиги боис, унга Давлат хизматлари агентлигининг вилоят бошқармаси томонидан туғилганлик тўғрисидаги гувоҳнома берилди.
ЎзА ёзишича, Рабза момо ҳужжати йўқлиги учун бир умр армон билан яшаб келган. Иккинчи жаҳон уруши даврида фронт ортида меҳнат қилган, колхозда кетмон чопган, пахта терган, кечалари билан тикиш тиккан. Ўғил-қизларини ўқитган, олий маълумотли қилган... Аммо шахсини тасдиқловчи ҳужжатларини кўп марта ҳаракат қилса ҳам тўғирлай олмаган.
Маълум бўлишича, Рабза момо сингари "ҳужжатсиз қариялар" Сирдарё туманида яна 5 нафарни ташкил қилар экан. Улар қарилик пенсияси ва ҳатто кўп йиллик меҳнатлари натижасида орттирган ногиронликлари учун нафақаларини ҳам ололмай келган.
"Халқимизнинг, ҳечдан кўра кеч яхши, деган доно мақоли бор. Мана моможонлар салкам 100 йилдан кейин бўлсада, туғилганлик гувоҳномалари бугун қўлларига тегди. Худо хоҳласа, эрта-индин паспорт ҳам, аллақачонлардан буён олишлари керак бўлган пенсиялар ҳам тегишли идоралар ходимлари томонидан беришларига энди асло шубҳа қилманг" дейилади ЎзА хабарида.
