Бугун ўз ишини бошлаган Олий Мажлиси Сенатининг бешинчи ялпи мажлисида Сенат раиси Танзила Норбоева мактаб ўқувчиларининг ота-оналарига алоҳида мурожаат билан чиқди.
Сенат раисининг айтишича, фарзандининг арзимаган шикояти учун мактабга югуриб келиб ўқитувчига “ташланиш”дан кўпчилик ота-оналар уялмай қўйди.
Эндиликда Маъмурий жавобгарлик тўғрисидаги кодексга ўқитувчиларнинг касбий фаолиятига ноқонуний аралашиш ёки унинг хизмат вазифаларини бажаришига тўсқинлик қилиш боғлиқ қўшимча киритилмоқда. Унга кўра, ўқитувчининг ўқувчилар билимини баҳолашига қонунга хилоф равишда аралашиш ёки бошқа ҳолларда унинг ишига тўсқинлик қилганлик учун жавобгарлик кўзда тутилмоқда. Яъни фуқароларга базавий ҳисоблашнинг 10 бараваригача, мансабдор шахсларга эса 15 бараваригача жарима белгиланмоқда.
Мазкур қўшимча кўзда тутилган қонун сенаторлар томонидан маъқулланди. Президент томонидан имзоланиб, матбуотда расман эълон қилингач кучга киради.
