17 июнь куни АҚШ президенти Дональд Трамп уйғурларга зулм қилишда айбдор деб топилган хитойлик амалдорларни санкциялар билан жазолаш ҳақидаги қонунга имзо чекди. Конгрессда фақатгина битта қарши овоз олган ушбу қонун орқали АҚШ Хитойга инсон ҳуқуқлари бўйича жиддий огоҳлантириш юборди.
БМТ маълумотларига кўра, айни пайтда Хитойнинг Шарқий Туркистон (Шинжон) вилоятида бир миллиондан ортиқ мусулмонлар “қайта тарбиялаш” лагерларида ҳибсда ушланиб турибди. АҚШ Давлат Департаменти Хитой ҳукуматини ушбу мусулмонларга зулм қилишда, уларни таҳқирлашда,уларнинг маданияти ва динини йўқ қилишда айбламоқда.
Ушбу айбловларни рад этиб келаётган Хитой эса ушбу лагерларда одамларга касб-ҳунар ўргатилаётганлиги ва улар терроризмга қарши курашда керак эканлигини таъкидлайди. Хитой ҳукумати Трампнинг уйғурлар ҳақидаги қонунни имзолаганини жаҳл билан кутиб олди ва уни ўзига қарши ғаразли ҳужум эканлиги ҳамда Шарқий Туркистондаги вазият нотўғри танқид қилинганини таъкидлади.
“Биз яна бир бор АҚШни ўзининг хатоларини тузатишга, бу қонун орқали Хитой манфаатларига зарар етказишни тўхтатишга ва Хитойнинг ички ишларига аралашмасликка чақирамиз. Акс ҳолда, Хитой бунга қаттиқ жавоб қайтаради ва бунинг барча оқибатларига АҚШ жавобгар бўлади”, дейилади Хитой Ташқи ишлар вазирлги берган баёнотда.
Хитойдан ташқарида фаолият олиб борувчи Дунё Уйғур Конгресси бу қарорни кучга киритгани учун Трампга миннатдорчилик билдирган ва бу қонун умидсизликка тушган уйғур халқига умид берганини таъкидлаган.
Уйғурлар ҳақидаги қонун Хитой Коммунистик Партиясининг Шарқий Туркистондаги котиби Чен Қуангуони инсон ҳуқуқларининг бузилишида айбдор деб ҳисоблайди ва унга нисбатан санкциялар қўллашни маъқуллайди.Шунингдек, мазкур қонунда Шарқий Туркистонда фаолият олиб бораётган АҚШ компаниялари мажбурий меҳнат асосида ишлаб чиқарилган маҳсулотлардан фойдаланмаслиги кераклиги айтилган.
