“Афсоналар водийси” — майдони ва ҳашамати жиҳатидан Марказий Осиёдаги энг йирик кўнгилочар истироҳат боғларидан бири. Олдинга қўйилган мақсадини уддалай олган наманганлик тадбиркор 123 миллион долларлик ушбу лойиҳанинг 102 миллион долларлик ҳаражатларини ўз ҳисобидан молиялаштирган. Бу ерга келиб, ҳаммасинги ўз кўзингиз билан кўриб, “пулига яраша экан” деган хулосага келасиз. Ҳатто 2 йил олдин ҳам Наманган шаҳрининг бу ҳудудида қачондир бундай ободончилик бўлиши кимнинг хаёлига келибди дейсиз. Бугун эса барча афсоналар ҳақиқатга айланган.
ПРЕЗИДЕНТ НОМ ҚЎЙГАН МАСКАН
155 гектар майдонни эгаллаган “Афсоналар боғи” қурилгунча бу ерлар сел сувини йўналтириб юбориш учун қўлланилган ташландиқ жойлар бўлган. Давлатимиз раҳбари 2018 йил май ойида вилоятга ташрифи чоғида “Афсоналар водийси” маданият ва истироҳат боғи лойиҳаси билан танишган ва уни энг замонавий талаблар асосида барпо этиш зарурлигини таъкидлаганди. Ўтган йилги ташрифи доирасида қурилиш ишларини кўздан кечириб, уни тез ва сифатли амалга ошириш юзасидан тегишли кўрсатмалар берган эди. Куни кеча 26-27 июнь кунлари Наманган вилоятига қилган ташрифи чоғида ҳам ушбу маданият ва истироҳат боғини кўздан кечирди.
“Икки йил олдин мана шу боғ лойиҳаси билан танишиб, унга “Афсоналар водийси” деб ном беришни таклиф қилгандим. Номига муносиб бўлибди. Мамлакатимизда бу каби замонавий дам олиш масканларини ҳали кўплаб барпо этамиз”, - деди давлатимиз раҳбари.
ДУНЁДА ТЎРТТАДАН БИТТАСИ
Айни пайтда магистрал йўл орқали иккига бўлинувчи боғнинг бир тарафида 16 турдаги аттракционли тематик парк, 2400 ўринли амфитеатр, 7 хил сув аттракционлари ва 16 та бассейнли аквапарк, 2 та замонавий шаршара ва мусиқали фаввора, 3 та ресторан, 1800 ўринли 2 та автотураргоҳ ташкил этилган. 2022 йил март ойига қадар миллий ҳунармандлар маркази, масжид ва йўлнинг иккинчи тарафида 400 ўринли меҳмонхона, 110 та виллани ишга тушириш режалаштирилган. “Афсоналар боғи”нинг иш бошқарувчиси Иброҳим Маматқуловнинг таъкидлашича, ушбу маданият ва истироҳат боғи кенглиги, имкониятлари ва кўплаб жиҳатларини инобатга олганда дунёда тўрттадан биттаси ва Марказий Осиёдаги ягона маскан бўлади.
ИШ ЎРИНЛАРИ
1 минг 500 та иш ўрни яратиш кўзда тутилган бу масканда бугунги кунда 600 нафар ишчи-ходим фаолият юритмоқда.
ТААСУРОТ
Боғни айланар экансиз, ростдан ҳам бу ерлар қачондир сел сувини кутишдан бошқа вазифани бажармаган майдон бўлганига ишонгингиз келмайди. Бугун бу ерлар гўзал Наманган шаҳрининг кўркига мос гўшага айланган. Келажакда эса бу боғ ҳақиқий афсонага айланиб, ягоналигини сақлаб қолиб, гуллар шаҳрининг рамзий ташриф қоғозига айланишига ишонамиз!
Сардорбек Раҳмонқулов
Мавзуга оид:
“Тила тилагингни.”: Учқўрғон “камалак” балиғи эртак эмас
40 йиллик ташландиқ ер 3 ойда серҳосил майдонга айланди
Чортоқликлар учун “мумкин эмас” деган иборани қўллаш мумкин эмас
