Пандемия сабабли мамлакатлар ўртасида авиақатновларнинг вақтинча тўхтатилиши оқибатида Корея Республикасида меҳнат фаолиятини амалга ошириш жараёнида меҳнат таътили олиб Ўзбекистонга келган кўплаб фуқаролар иш жойига қайтиб кета олмаётган эди.
Бугун, 30 июнь куни «Asiana» авиакомпаниясининг Тошкент-Инчон йўналишидаги чартер рейси орқали 29 нафар фуқароларимиз Кореяга етиб борди. Бу ҳақда Ташқи меҳнат миграцияси агентлиги Матбуот хизмати хабар бермоқда.
Фуқаролар HRD ташкилоти ва Агентликнинг Кореядаги ваколатхонаси ходимлари томонидан кутиб олингач, уларга аэропортдаги белгиланган қатъий тартибдаги текширувлардан ўтишда амалий ёрдам кўрсатилди.
Шундан кейин 14 кунлик мажбурий карантин талабларига риоя қилиш бўйича розилик битимида кўрсатилган манзилларига кузатиб қўйилди.
Шунингдек, Агентлик Фирибгарлик ёки ортиқча оворагарчиликларнинг олдини олиш мақсадида бирор ноқонуний хатти-ҳаракатлар ҳақида маълумотга эга бўлганларда Ташқи меҳнат миграцияси агентлигига 71 202 33 55 (ички рақам 41, 46, 11) телефон рақами орқали хабар беришларини сўрамоқда.
Маълумот ўрнида таъкидлаш жоиз, Ташқи меҳнат миграцияси агентлиги ва Корея Республикасининг Инсон ресурсларини ривожлантириш хизмати рухсатига эга бўлмаган 8 нафар фуқаро (Д.Усманов, Б.Маҳмудов, М.Умаров, М.Баротов, Т.Ҳаитов, Б.Латифов, А.Азимов, М.Зиятов) авиачипта сотиб олган, оқибатда авиакомпания уларга парвоз бортига киришга рухсат бермаган.
Натижада фуқароларнинг ушбу ҳаракатлари ортиқча оворагарчилик ва харажатларга сабаб бўлган.
Ташқи меҳнат миграцияси агентлиги белгиланган эпидемиологик талаблар ва карантин чекловларига риоя қилган ҳолда Корея Республикасидан таътилга келган фуқароларни навбати билан ўз иш жойларига қайтариш борасидаги ишларини давом эттиради, дейилади хабарда.
