Аввал хабар қилинганидек, Яккасарой туман тиббиёт бирлашмаси шифокори А.У.нинг шу йилнинг 14 июнь кунидан Тошкент вилояти Юқори Чирчиқ туманидаги карантин марказидаги фуқароларга тиббий хизмат кўрсатиш мақсадида фаолият кўрсата бошлаган, 23 июнь куни аҳволи оғирлашиб, 26 июнда эса вафот этган эди.
Шундан сўнг, марҳум шифокорнинг қизи отасининг ўлими юзасидан айрим маълумотларни келтириб, бошқаларни ҳам огоҳликка чақирди.
Айни пайтда маълум бўлишича, Соғлиқни сақлаш вазири Алишер Шодмонов коронавирусдан вафот этган шифокорнинг хонадонига ташриф буюрган. Бу ҳақда марҳумнинг қизи Микрофон кўтарган аёлга маълум қилган.
"Ҳозиргина Шаҳноза Ҳасанова қўнғироқ қилиб, хонадонига Соғлиқни сақлаш вазири Алишер Шодмонов келганини айтди. Вазир оила аъзоларидан cамимий кўнгил сўраб, бу шифокорлар жамоаси учун ҳам оғир жудолик бўлганини билдирган. Ш. Ҳасанова соғлиқни сақлаш тизими унинг изтиробларини тўғри тушунгани учун миннатдор. Оила боқувчисини йўқотгани, хизмат фаолияти давомида Ковид инфекциясига чалиниб вафот этгани инобатга олиниб қонуний барча компенсациялар қопланиши маълум қилинган. Шунингдек, Ш. Ҳасанова у билан бирга ҳамдард бўлган, мурожаатига бефарқ бўлмаган барча жамоатчилик вакиллари, журналистлар ва блогерларга ўз раҳматини айтди", — дейилади хабарда.
