Хушнудбек Худойбердиев Ўзбекистон миллий ахборот агентлиги Бош директори ўринбосари этиб тайинланди. Бу ҳақда Янги Ўзбекистон нашри маълум қилди. Хушнуд Худойбердиев 2013 йилдан буён шу лавозимда ишлаб келган Жуманазар Мелиқулов ўрнини эгаллаган.
Сал аввал ижтимоий тармоқларда ЎзА ва Ўзбекистон Телерадиокомпаниясида кадрлар алмашинуви бўлаётгани, ёш кадрлар лавозимларга тайинланаётгани ҳақида хабарлар пайдо бўлган эди.
Маълумот учун: Худойбердиев Хушнудбек Ғайратович — ҳуқуқшунос, блогер. Заковат интеллектуал клуби билимдонларидан бири. 2020-йилдан эътиборан Миллий масс-медиани қўллаб-қувватлаш ва ривожлантириш жамоат фонди директори сифатида фаолият олиб келаётган эди.
Х.Худойбердиев 1989-йил 7 июнда Қашқадарё вилоятининг Чироқчи туманида туғилган.
У 2012-йилдан буён Xushnudbek.uz шахсий сайтини юритади. Шунингдек, 2018 йил май ойида Телеграм мессенжерида шахсий канал очган. Ҳозирда унинг Телеграм каналини 287 мингдан кўпроқ обуначи кузатиб боради. 2018 йилги блогерлар чемпионатида 2-ўринни қўлга киритган. 2019 йилда эса йилнинг энг яхши блогери деб топилган.
