Ижтимоий тармоқларда эълон қилинган “Чироқчида куйдирги касаллиги тарқалгани ростми?” материали бўйича Ветеринария ва чорвачиликни ривожлантириш қўмитаси ўзининг расмий муносабатини билдирди.
Келтирилишича, вилоят ишчи гуруҳи томонидан Қашқадарё вилоятининг Чироқчи туманида қишлоқ хўжалиги ҳайвонлари орасида куйдирги касаллиги тарқалганлиги ўрганиб чиқилган. Унга кўра, тумандаги барча тоифадаги хўжаликларда 200 минг бошдан зиёд йирик шохли, 605 минг бошга яқин майда шохли моллар ва 15 минг бошга яқин бошқа тур ҳайвонлар мавжуд бўлиб, 2020 йилнинг ўтган даврида чорва молларининг 650 минг бошдан зиёди куйдирги касаллигига қарши профилактик эмланган ва эмлаш ишлари ҳали давом эттирилмоқда.
Касаллик кузатилган дейилган “Чияли” МФЙнинг Чувуллоқ ва Тўқмор қишлоқлари ҳам атрофлича ўрганилган. Хусусан, касалликка гумон қилинган Чувуллоқ қишлоғида яшовчи бемор С. Ш. (эркак)хонадонини ўрганилганда, фуқаронинг чорва моллари жорий йилнинг февраль ойида куйдирги касаллигига қарши эмланган. Ушбу қишлоқда параваришланаётган 635 бош қорамол, 1000 бошга яқин қўй-эчкилар ва бошқа тур ҳайвонлар ишчи гуруҳ томонидан клиник кўрикдан ўтказилганда уларда касаллик аломатлари кузатилмаган. Куйдиргига чалингани гумон қилинган Тўқмор қишлоғилик беморлар М.Х (аёл) ва З. Т. (эркак)лар хонадонидапарваришланаёган чорва моллари ва уй ҳайвонлари ҳам шу йилнинг февраль ойида куйдирги касаллигига қарши профилатик эмланганлиги маълум бўлган.
Яна бир ҳолат, шу қишлоқда яшовчи К. Қ (эркак) ўзига тегишли бўлган мол касалланганда ветеринария врачига мурожаат қилмасдан 25 июнь куни сўйган. Ушбу ҳайвонда куйдирги касаллигини аниқлаш учун тупроқ намуналари олиниб, Вилоят ҳайвонлар касалликлари ташхиси ва озиқ-овқат маҳсулотлари хавфсизлиги давлат марказининг тегишли бўлимида бактериологик ва биологик усуллар асосида текширилганда куйдирги касаллиги қўзғатувчиси аниқланмади.
Хуллас, тақдим этилган маълумотларда келтирилишича, Чироқчи туманида куйдирги касаллигига гумон қилинган ҳолатлар ўз тасдиғини топмаган. Ҳудудда чорва молларининг юқумли касалликлари бўйича соғлом муҳит сақланиб келинаётгани айтилмоқда. Биз ҳам куйдирги каби ўта хавфли юқумли касалликлар бўйича эпизоотик барқарорликни таъминланиши ва тўлиқ назоратга олиниши тарафдоримиз.
