Қорақалпоғистоннинг Беруний туманида аҳоли экинларини суғориш учун сув келмагани сабабли Нукус-Тошкент магистрал йўлини ёпиб қўйди. Туман ҳокими ва бошқа мутасаддилар воқеа жойига келиб, масала қисқа вақтда ижобий ҳал этилди.
Қорақалпоғистон Республикаси Беруний тумани ҳокимлиги туманнинг Абай ОФЙ ҳудудидаги Қуролпа аҳоли манзилида катта йўл бўйида содир бўлган тартибсизлик бўйича расмий маълумот берди, дея хабар қилди «Қарақалпақ 24» Telegram-канали.
20 июль куни YouTube видеохостингида аҳоли магистрал йўлни тўсиб қўйгани акс этган видеоёзув эълон қилинган эди. Унда юк ташувчи ва енгил автомобиллардан иборат катта тирбандлик ҳосил бўлганини кўриш мумкин.
Туман ҳокимлиги ахборот хизматининг қайд этилишича, томорқаларга сув етиб бормаётганлиги ва 10 кун давомида Найман каналига сув келмагани аҳоли норозилигига сабаб бўлган. Тартибсизликлар жойига Беруний тумани ҳокими ва мутасадди раҳбарлар етиб боришди ва қисқа вақт ичида Найман каналига сув етказиб берилди.
«Беруний тумани қишлоқ ҳўжалиги бўйича 13 та ҳудудга бўлинган бўлиб, уларда навбатма-навбат суғориш тизими жорий қилинган. Ҳозирги кунда ҳароратнинг юқорилиги экинларнинг тез сувсизланишини келтириб чиқармоқда», — дейилади хабарда.
