Юнусобод туманида ишга киритиб қўйиш эвазига 400 АҚШ доллари талаб қилган солиқ ходими ушланди. Бу ҳақда "darakchi.uz"га Бош прокуратура Матбуот хизмати хабар берди.
Бош прокуратура ҳузуридаги Департаментнинг Юнусобод туман бўлими томонидан ДХХ билан ҳамкорликда ўтказилган тезкор тадбирда, Мирзо Улуғбек тумани Давлат солиқ инспекцияси Жисмоний шахсларга хизмат кўрсатиш бўлими давлат солиқ катта инспектори К.Ж. хизмат мавқеидан фойдаланиб, фуқаро Ю.М.ни Мирзо Улуғбек тумани Давлат солиқ инспекциясига ёрдамчи вазифасига ишга киритиб қўйиши эвазига 400 АҚШ долларини олган вақтида ашёвий далиллар билан ушланган.
Мазкур ҳолат юзасидан фуқаро К.Ж.га нисбатан Жиноят кодексининг 168-моддаси 3-қисми “в” банди ва 28,211-моддаси 1-қисми билан жиноят иши қўзғатилиб, тергов ҳаракатлари ўтказилмоқда.
