Аввал хабар берилганидек, Республика махсус комиссияси қарори билан карантин чекловлари 15 августга қадар узайтирилди. Республикада автомобилларга маълум муддат оралиғида ҳаракатланишига рухсат берилмоқда.
Қарши шаҳида ҳам автотранспорт воситалари эрталаб 07.00 дан – 10.00 гача ва кеч соат 17.00 дан – 20.00 гача тегишли ҳудуд доирасида ҳаракатланишига рухсат бериладими, деган саволга Қашқадарё вилояти ҳокимлиги Матбуот хизмати раҳбари аниқлик киритди.
"Қарши шаҳрида автотранспорт воситалари ҳаракати бутунлай тўхтатилади. Яъни, эрталаб 07.00 дан – 10.00 гача ва кеч соат 17.00 дан – 20.00 гача ҳамда бошқа вақтларда ҳам ҳаракатлана олмайди.
Фақатгина фуқароларнинг саломатлиги ёмонлашганлиги, ҳомиладорлиги муносабати билан шифокор кўригидан ўтиш учун даволаш муассасасига ёхуд зарур дори-дармон харид қилиш мақсадида дорихонага бориш-келиш, қишлоқ хўжалик маҳсулотлари ва озиқ-овқат маҳсулотлари етказиб бериш, ташиш билан шуғулланувчилар, қурувчи ташкилотлар ва тадбиркорлик субъектларига тегишли жиҳоз, хом-ашё материалларини ташишга мўлжалланган автомашиналари бундан мустасно.
Вилоятнинг Шаҳрисабз шаҳри ва бошқа туманларида автотранспорт воситалари эрталаб 07.00 дан – 10.00 гача ва кеч соат 17.00 дан – 20.00 гача тегишли ҳудуд доирасида ҳаракатланиши мумкин", - дея изоҳлаган Аҳрор Содиқов
