Қаршида босқинчилик билан шуғулланган 15 нафар кишидан иборат «Жиҳодчилар» гуруҳи аъзолари қўлга олинди.
Қашқадарё вилоятининг Қарши шаҳрида муқаддам жиноий жавобгарликка тортилган шахс томонидан ташкил этилган ноқонуний гуруҳ фаолиятига чек қўйилди. Гуруҳ аъзолари босқинчилик жиноятларини содир этиш орқали йўл харажатларига пул йиғиб, сўнгра Сурияга бориб, террорчилик ташкилотлари сафига қўшилишни режалаштирган. Улар Давлат хавфсизлик хизмати ва ички ишлар ходимларининг қўшма тадбирида қўлга олинди. Бу ҳақда "Ўзбекистон 24" телеканали лавҳа тайёрлаган.
Гуруҳни тузган 52 ёшли фуқаро аввал “Жиҳодчилар” диний-экстремистик оқимига аъзо бўлгани учун 2004-2008 йилларда жазо муддатини ўтаган бўлса-да, яна шу йўлда давом этган. У яшаш манзилида бу сафар 1994, 1996, 1998 йилда туғилган фарзандлари, 2000 йилда туғилган жияни ва 1974-1998 йиллар оралиғида туғилган 11 нафар фуқародан иборат ноқонуний гуруҳ ташкил этиб, “Жиҳодчилар” оқими ғояларини қўллаб-қувватлаб келган.
Бундан ташқари, ижтимоий тармоқда гуруҳ очиб, унга диний-экстремистик оқимлар ва террорчилик ташкилотларининг ғоявий раҳнамолари бўлмиш Абу Салоҳ, Абдуллоҳ Зуфар, Содиқ Самарқандий ва бошқаларнинг ҳижрат, жиҳод ва шаҳидликка чорловчи аудио, видео материалларини жойлаштириб, тарғибот ишлари олиб борган.
Гуруҳ етакчисининг кўрсатмаси билан унинг аъзолари босқинчилик жиноятлари орқали йўл харажатлари учун пул йиғиб, сўнгра Сурияга бориб, террористик ташкилотлар сафига қўшилишни режалаштирган.
