Сал аввал, Тошкент вилоятининг бир қатор туманларида давлат рақами йўқ ёки яширинган қора рангдаги автомобиллар ҳаракатланиб юришгани ҳақида айтилган эди.
Ички ишлар вазирлиги ЙҲХББ Ахборот хизматининг маълум қилишича, олиб борилган суриштирув ишлари давомида ана шундай давлат рақамини яшириб ҳаракатланиб юрган автомобиллардан бири “Кон геология фаолиятини назорат қилиш инспекцияси”га тегишли “Каптива” русумли қора рангли автомобил эканлигини аниқланган.
Шунга кўра, автомобил ҳайдовчисига нисбатан белгиланган тартибида баённома тузилиб, транспорт воситаси МжТКнинг 291-моддаси тартибида вақтинча сақлаш учун жарима майдончасига жойлаштирилган.
Бироқ ҳайдовчи бундай ишни "кимдандир" топшириқ бўлмаса ўзбошимча қилмаса керак, дея муносабат қилмоқда депутат Расул Кушербаев.
"Кон геология фаолиятини назорат қилиш инспекцияси шундай қилиб тургандан кейин оддий фуқаролардан нима кутиш мумкин. Умуман бу идорага ҳаммага тенг қонун қоидани менсимай юриш учун ким бунча "дух" берган, деган савол қизиқ.
Тошкент вилояти ҳудудидаги дарёлар устидан ўтган бир қатор кўприкларнинг пойдеворига қадар қум шағал олиниб, кўприкларнинг авария ҳолатига етиб келаётганлигининг ўзидан ҳам бу идоранинг ўз ишини қанчалик қонуний ва ҳалол олиб бораётганига етарли саволлар бор", дея млоҳаза қилмоқда депутат.
