Бир неча кун аввал бир гуруҳ депутатлар Вазирлар Маҳкамасининг автомобиль чироқларини кундузи ёқиб юришни мажбурий этувчи қарорига ўзгартиш киритиш бўйича таклиф билдириб, Бош вазир Aбдулла Ариповга хат юборишди.
Уларнинг мурожаати ва таклифлари ҳукумат томонидан беэътибор қолдирилмади. Бу ҳақда депутат Дониёр Ғаниев ёзмоқда:
"Мендаги маълумотларга кўра, Бош Вазиримиз топшириқларига асосан 2019 йил 4-июнда қабул қилинган "Йўл ҳаракати хавфсизлигини таъминлаш бўйича қўшимча чора-тадбирлар тўғрисида"ги 460-сонли қарор бекор қилиниши кутилмоқда. Шу билан жамоатчиликни эътирозига сабаб бўлган "фаралар" масаласига нуқта қўйилади, деб умид қиламиз.
Ҳукумат томонидан жамоатчилик фикри, депутатлар мурожаатига бефарқ бўлмай, қабул қилинаётган қарор ва ҳужжатларда халқ манфаатлари инобатга олинаётганини олқишлаймиз. Зеро бу биз қуришни истаётган Янги Ўзбекистон, яъни қонун устуворлигига асосланган, демократик давлатнинг асосий шартидир".
