Кеча Бухоро вилоятига ташриф буюрган президент Шавкат Мирзиёев бухороликлар билан учрашув чоғида синовли бўлган ўз президентлик даври ҳақида гапирди, дея маълум қилди “Даракчи” мухбири Сардорбек Раҳмонқулов.
У ўз нутқида ўзбек халқи учун доим “оғир юк” бўлиб келган пахта “план”идан воз кечилгани яхши сабоқ бўлгани, бугунги кунда, ҳаттоки, президент қаерда қанча пахта етиштирилаётганига қизиқмаётганини ҳам айтиб ўтди.
Маърузасини давом эттираркан, давлат раҳбари пандемия ҳам қандай сабоқ бўлгани ҳақида айтиб ўтди. “Ўтган 5 йил ҳаммамиз учун синов бўлди. Мен ҳам 5 йил олдинги президент эмасман. Мана, ҳамон давом этаётган пандемия сабабли бутун дунё иқтисодиёти тўхтаб қолди. Тарихда бунақаси бўлмаган. Бутун дунё ёпилди. Лекин халққа ойлик бериш, улар эса оиласини боқишлари керак. Шунинг учун мен кўп жойларда энди мана шундай шароитда ишлашни ўрганишимиз керак, деб айтаман. 80 триллион сўм пулимиз кетди. Муҳими, халқимизнинг саломатлиги”, деди Шавкат Мирзиёев.
