Кеча, душанба куни Германия Россия ва Украина ўртасида эҳтимолий урушдан қўрқиб, ҳарбий-ҳаво кучлари орқали 70 нафар немис аскарини Литвага етказиб берди. Маълумотга кўра, улар умумий ҳисобда 950 кишига етказилиши кутилмоқда. Бу ҳақда ОАВ ёзмоқда.
Шу билан бирга, Германия дипломатик ҳаракат қилишда давом этмоқда. Мамлакат канцлери кеча Киевга келди ва Украина президенти Зеленский билан музокаралар олиб борди. Шольцнинг таъкидлашича, Россия уюштириши мумкин бўлган босқин унинг учун даҳшатли иқтисодий оқибатларга олиб келади.
"2 миллиард доллардан ортиқ ёрдам билан биз Украина иқтисодиётини янада мустаҳкам ва мустақил қилдик. Чет эл таъсирига қарамай, унинг барқарорлигини таъминлашга ёрдам бердик. Сизни ишонтириб айтаманки, биз худди шундай қатъият билан бу ёрдамни давом эттирамиз"- дейди Олаф Шольц.
Қайд этилишича, раҳбар Украинанинг НАТОга кириши мумкинлиги ҳақида ҳам сўз юритган.
Эслатиб ўтамиз, аввалроқ Америка ва Европа дипломатлари Киевни тарк этаётгани хақида хабар берган эдик.
