28 май, шанба куни Афғонистоннинг Нимроз вилоятида маймунчечак билан гумон қилиниб, икки бемор Covid-19 шифохонасига ётқизилган ва уларда касаллик аниқланган. Бу ҳақда мамлакат Соғлиқни сақлаш вазирлиги хабарига таяниб, йирик ахборот агентлиги "Ariana News" хабар бермоқда.
Ҳудудий манбаларга кўра, вирус аниқланган ҳар икки фуқаро ҳам Эрондан депортация қилинган мигрант бўлган.
Aгентлик касалликнинг илк белгилари ҳақида ҳам маълумот бериб ўтган. Қайд этилишича, улар иситма, қорин, мускуллар ҳамда умуртқадаги оғриқ, теридаги оқ тошмалар кабилардир.
Кутилмаган “меҳмон” ташрифи — маймунчечак қандай пайдо бўлган?
Маймунчечак вируси бироз оғир оқибатларга олиб келсада, мутахассисларнинг таъкидлашича, инфекция эҳтимоли паст. У, асосан, марказий ва ғарбий Африка давлатларининг чекка ҳудудларида, тропик ўрмонлар яқинида учрайди.
Буюк Британия Соғлиқни сақлаш хавфсизлиги агентлигининг таъкидлашича, инфекцияни юқтиришдан хавотирда бўлган ҳар бир киши тиббий мутахассисга мурожаат қилиши керак. Аммо ташриф буюришдан олдин клиника билан боғланиш даркор.
Маймунчечак қайси давлатларда тарқалиши мумкин?
Мутахассислар тадқиқотида Португалияда бўлиб қайтган 30 ёшли эркакни ўрганган, у 13 май куни поликлиникага папулалар ва катталашган лимфа тугунлари шикояти билан борган. Унинг шеригида ҳам шунга ўхшаш аломатлар кузатилган.
Дастлаб улардан олинган намунада тестлар герпес ва сифилисни қўзғатувчи вирусга салбий чиққан. Бироқ Европада маймунчечак ҳолатлари ҳақида огоҳлантиришлардан сўнг, беморда ушбу касалликнинг қўзғатувчиси учун тест ўтказилган, натижа эса ижобий бўлган. Олимлар вирус геномининг 98,9 фоизини қайта тиклашга муваффақ бўлган.
"Дастлабки филогенетик таҳлил шуни кўрсатадики, олинган геном Ғарбий Африканинг маймунчечак гуруҳига тегишли ва яқинда Португалияда касалликнинг тарқалишига сабаб бўлган геном билан чамбарчас боғлиқ. У хасталикнинг Европада сезиларли даражада тарқалишига ҳисса қўшган", — деган тадқиқотчилар.
Ўзбекистонда вазият қандай?
Маълумот учун, Ўзбекистонда ҳозирга қадар маймунчечак касаллиги қайд этилмаган. Айни пайтда ЖССТ тавсияларидан келиб чиқиб бу инфекциянинг мамлакатга кириб келмаслиги учун зарур чоралар кўрилмоқда.
