Украинанинг Львов шаҳрида Владимир Зеленский, Туркия президенти Ражаб Тоййиб Эрдўғон ва БМТ Бош котиби Антониу Гутерриш иштирокида саммит ўтказилади.
Унда асосий эътибор Россия-Украина урушини дипломатик йўллар билан тугатишга қаратилади.
Туркия президенти сайтидаги баёнотга кўра, Эрдўғон Зеленскийнинг таклифига биноан 18 август куни Львовга бир кунлик амалий ташриф билан боради.
Мулоқот чоғида лидерлар Туркия-Украина муносабатларининг стратегик шериклик даражасидаги барча жиҳатларини муҳокама қилади.
“Шунингдек, ташриф доирасида Президент Владимир Зеленский ва Бирлашган Миллатлар Ташкилоти Бош котиби Антониу Гутерриш иштирокида уч томонлама саммит ўтказилиши режалаштирилган, унда экспорт бўйича шакллантирилган механизм фаолиятини тобора кўпроқ қўллаб-қувватлаш бўйича потенциал қадамлар кўриб чиқилади. Украина ғалласини жаҳон бозорларига олиб чиқиш ҳамда Украина ва Россия ўртасидаги урушни дипломатик йўллар билан тугатиш”, — дейилади баёнотда.
Эслатиб ўтамиз, август ойининг бошида Сочи шаҳрида Эрдўғон Путин билан ҳам музокара ўтказган эди.
