Андижон шаҳрида сифати кафолатланмаган дори воситалари ва биологик фаол қўшимчалар ишлаб чиқариш билан шуғулланган яширин цех фаолиятига чек қўйилди. Бу ҳақда Божхона қўмитаси Матбуот хизмати хабар қилди.
Қайд этилишича, шаҳардаги манзиллардан бирида 4 та юридик шахс “озиқ-овқат маҳсулотлари учун кимёвий қўшимчалар” ишлаб чиқариш ниқоби остида ноқонуний равишда дори воситалари ва биологик фаол қўшимчалар тайёрлаб келган.
Текширувлар давомида мазкур яширин лабораторияда аҳоли орасида кенг тарқалган Vitamix, Gegsi, “Ferrumfer”, Winds Baby, “Lyuvit”, “Yodovit”, “Gepporooz”, “Bifidolin” ва “Yodoplyus” каби 100 турдаги маҳсулотлар ишлаб чиқарилгани маълум бўлган.
Улар орасида болалар учун сироплар, оғриқ қолдирувчи воситалар, бўғим ва тери касалликларига қарши препаратлар, қон кўпайтирувчи дори воситалари, шамчалар ҳамда махсус чойлар ҳам бўлган.
Маълум қилинишича, маҳсулотлар ташқи кўриниши жиҳатидан харидорда ишонч уйғотадиган тарзда қадоқланган. Бироқ улар мутлақо антисанитария шароитида тайёрланган ва сақланган.
Тезкор тадбирлар давомида яширин цехдан 13 та ишлаб чиқариш ускунаси, 6 та муҳр, яроқлилик муддатини туширувчи қурилмалар, 214 минг дона ёзувсиз бўш шиша идиш, 78 минг дона бўш капсула, 503 минг 209 дона тайёр маҳсулот ҳамда 105 килограмм номсиз кукун ашёвий далил сифатида олинган.
Дастлабки ҳисоб-китобларга кўра, мусодара қилинган маҳсулотларнинг умумий қиймати қарийб 5 миллиард сўмни ташкил қилади.
Ҳозирда ҳолат юзасидан божхона органлари томонидан терговга қадар суриштирув ишлари олиб борилмоқда.
Эслатиб ўтамиз, жорий йил март ойида ҳам Андижонда қалбаки дори воситалари ишлаб чиқарган шахслар қўлга олинганди. Ўшанда мусодара қилинган маҳсулотларнинг асл нусхалари қиймати 10 миллиард сўмга баҳоланган. Мутахассислар ушбу дорилар сотувга чиққанда 200 мингдан ортиқ бемор саломатлигига жиддий хавф туғдириши мумкинлигини билдирган эди.
