⚡️“Туркияда ўқилаётган жанозалар бизнинг уйимизда бўлаётган мотамдир” (видео)

Туркия — ўзбекистонликлар энг кўп ташриф буюрадиган қадрдон давлат, тарихи тарихимизга ҳамоҳанг гўзал гўша. Афсуски, бугун унинг ўнлаб ҳудудлари аянчли манзара касб этмоқда. Туркия ва Сурияда даҳшатли зилзила содир бўлди. Қулаган бинолар, уй-жойсиз қолган, ёрдамга муҳтож одамлар, минглаб қутқариб қолинганлару, минг афсуски вайроналар остидан олиб чиқилаётган яна минглаб қурбонлар... Бугун биз қардош юрт ҳақида фақат шуларни кўряпмиз. Айни пайтга қадар зилзила қурбонлари сони икки давлатда 25 мингдан, жароҳатланганлар эса 100 мингдан ошиб кетди. Бу рақамлар якуний эмас, дақиқалар сари талафот кўлами кенгайиб бормоқда. 

Офат фақат Туркия ва Суриянинг эмас, балки бутун дунёнинг, хусусан Ўзбекистоннинг ҳам дарду ташвиши, кўз ёшлари ва изтиробларига сабаб бўлди. Бутун ўзбек халқи қайғуга ботди. Ўзбеклар қардошлар учун ёрдамга шошмоқда. Ҳукумат юборган тезкор ёрдамлардан ташқари Ўзбекистон бўйлаб кўнгилли ёрдам марказлари ташкил этилиб, қисқа муддатда бутун халқ ўз инсонпарварлик ёрдамларини етказишмоқда, меҳр ва муҳаббатга йўғрилган энг зарур маҳсулотлар карвони Туркияга қараб йўлга чиқди. Жумладан, бугун, 11 февраль куни Тошкентдан энг зарур эҳтиёждаги маҳсулотлар жойланган 25 та юк машинаси Туркияга жўнаб кетди. Бундан ташқари, зилзила бўлган ҳудудларнинг ўзида ҳам айни пайтда ўзбекистонликлар томонидан хайрия ишлари бошлаб юборилган, ёрдам қўллари чўзилмоқда, овқатлар тайёрланиб халққа тарқатилмоқда. 

"Сенинг дардинг, менинг дардим бўлди, Туркия", "Биз Сен биланмиз, Туркия", "Бошинг омон бўлсин, Туркия"... Мазкур иборалар бугун ўзбек халқи томонидан жўр бўлиб айтилмоқда. Ижтимоий тармоқ фойдаланувчиларининг ҳар бири ўз изтироблари ҳақида қайта ва қайта ёзмоқда, турк қардошларига ҳамдардлик билдирмоқда.  

Кун келар табиат офати талафотлари бартараф этилар, вайроналар остида қолган ўнлаб шаҳарлар маълум муддат ўтиб яна аввалгидек гўзал қиёфага келар, бироқ яқинларини йўқотган, кўчада имкониятсиз қолган турк қардошларимиз бизнинг бугунги ғамхўрлигимизни йилларки унутмаса, ажабмас. Зеро, бугун Ўзбекистон "менинг Ота юртим" деган туркларга ўзининг қондош эканини исботламоқда.