Дональд Трамп олиб бораётган миграция сиёсати оқибатида 145 минг нафардан ортиқ бола ота-онасидан ажралган. Бу ҳақда Вашингтондаги "Brookings Institution" томонидан олиб борилган тадқиқот натижаларига таяниб хабар берилди.
Тадқиқотда қайд этилишича, 2025 йил январидан 2026 йил апрелигача АҚШ Миграция ва божхона полицияси (ICE) ходимлари томонидан тахминан 400 минг нафар киши қўлга олинган.
Бу жараёнлар жами 205 минг нафар болага бевосита таъсир кўрсатган. Улар орасида отаси ёки онаси (ёхуд ҳар иккиси) ушланган 146 635 нафар АҚШ фуқароси ҳам борлиги айтилмоқда.
Шунингдек, ҳисоботда 22 минг нафар боланинг ота-онаси ҳар иккиси ҳам ҳибсга олинган ҳолатлар қайд этилган.
Тадқиқотчиларнинг таъкидлашича, мазкур ҳолатлар ижтимоий ва психологик оқибатларни кучайтириб, миграция сиёсати атрофидаги баҳсларни янада кескинлаштириши мумкин.
