Бугун ижтимоий тарморқларда Ҳумо Аренадаги Jah Khalib концертидаги тартибсизликлар пайтида пичоқланиш ҳолати бўлгани ва ҳалок бўлганлар ва яраланганлар ҳам борлиги ҳақида хабарлар тарқалмоқда.
Мазкур хабарлар Миллий гвардия Тошкент шаҳар бошқармаси томонидан рад этилди.
"Пойтахтимиздаги “Ҳумо арена” саройида хонанда Jah Khalib нинг концертига кириш вақтида фуқаролар томонидан содир этилган тирбандликнинг ўз вақтида олди олинганлиги ва унинг сабаблари тўғрисида расмий саҳифаларимиз орқали тўлиқ маълумот берган бўлсакда, айрим ижтимоий тармоқларда нотўғри хабарларни тарқатишга уринишмоқда. Ижтимоий тармоқ фаолларидан асосланмаган ва текширилмаган маълумотларни тарқатмасликларини сўраб қоламиз. Эслатиб ўтамиз, аҳоли ўртасида ёлғон ахборот тарқатганлик учун жавобгарлик мавжуд!" - дейилади расмий муносабатда.
Эслатиб ўтамиз, 25 ноябр куни Тошкентдаги "Humo arena" саройида Jah Khalib'нинг концерт дастури бўлиб ўтди. Концертга ташриф буюрган фуқаролар "Humo arena" саройига кириш жойларида катта тирбандлик ҳосил қилган ва тартибсизлик ҳолатлари юз берган. Маълум бўлишича, концертга 10 мингдан ортиқ сотувга чиқарилган электрон чипталар сотиб олинган. Мухлислар тақдим этган электрон чипталар танишлари ёки бошқа жисмоний шахслардан совға сифатида ҳамда пул эвазига қўлга киритгани маълум бўлган. Айрим фуқаролар электрон чипталарни ўз манфаати йўлида такроран сотгани аниқланган.
