Тошкент шаҳрида интим хизмат кўрсатувчи аёлларни “ҳимоя” қилиб келган профилактика инспекторига суд ҳукми ўқилди. У фоҳишалик билан шуғулланувчи аёлларга нисбатан чора кўрмаслик ва рейдлар ҳақида олдиндан огоҳлантириш эвазига ҳар ой пул талаб қилиб келган.
Суд ҳужжатларига кўра, Яккасарой тумани профилактика катта инспектори С.Б. “Истамбул сити” турар-жой мажмуасида фаолият юритувчи аёлларга “ҳомийлик” қилишни ваъда қилган. Эвазига эса фуқаро Ш.Х.дан ҳар ой 400 доллар олиб турган.
Маълум қилинишича, инспектор аёлларни режалаштирилган “Орият” тадбирлари ҳақида олдиндан огоҳлантириб, уларга нисбатан чора кўрилмаслигини айтган.
2025 йил 28 ноябрь куни ДХХ ва ИИВ ходимлари томонидан ўтказилган тезкор тадбирда у навбатдаги 400 долларни олаётган вақтида қўлга тушган.
Судда айбланувчи айбига қисман иқрор бўлиб, қилмишидан пушаймон эканини билдирган. Суд уни Жиноят кодексининг 210-моддаси 1-қисми билан айбдор деб топди.
Ҳукмга кўра, С.Б. 2 йилга ички ишлар органларида ишлаш ҳуқуқидан маҳрум қилинди ва 4 йил муддатга озодликдан маҳрум этилди. Жазо манзил-колонияда ўтилади.
