Ижтимоий ҳимоя миллий агентлиги ва Ички ишлар вазирлиги ҳамкорлигида, Россия Федерацияси Ички ишлар вазирлигининг Новосибирск вилояти бўйича вояга етмаган ҳуқуқбузарларни вақтинча сақлаш маркази ходимлари кузатувида Андижон вилоятида яшовчи вояга етмаган фуқаро Ўзбекистонга қайтарилди.
Мазкур ҳолатга кўра, бола ота-онасининг яқин қариндошига ишончнома асосида Россия Федерациясига борган бўлиб, аммо ушбу ишончнома Россия ҳудудида юридик кучга эга эмаслиги сабабли вояга етмаган фуқаро ота-онаси қаровисиз қолган деб эътироф этилган.
Шу муносабат билан, 2002 йил 7 октябрда қабул қилинган Минск конвенсияси доирасида вояга етмаган фуқаро Ўзбекистонга қайтарилиши лозимлиги белгиланган.
Эслатиб ўтамиз, жорий йил давомида 100 нафардан ортиқ ўзбекистонлик вояга етмаган фуқаролар ватанга қайтарилиб, уларнинг ота-оналари ёки яқин қариндошлари қарамоғига топширилди.
Ижтимоий ҳимоя миллий агентлиги томонидан хорижда қийин вазиятга тушган болаларни ватанга қайтариш ва уларга ижтимоий ёрдам кўрсатиш бўйича олиб борилаётган чора-тадбирлар давом этмоқда.
