Туркия Қирғизистоннинг мамлакат олдидаги ташқи қарзидан кечди, деди президент Садир Жапаров 5 ноябрь куни Бишкекда Туркия етакчиси Ражаб Тоййиб Эрдўғон билан музокарадан сўнг.
"Ҳурматли президент Эрдоғанга Қирғизистон Республикасининг Туркия Республикаси олдидаги ташқи қарзини ҳисобдан чиқариш тўғрисида қабул қилинган қарор учун алоҳида миннатдорлик билдирмоқчиман", — деди у.
Қирғизистон президенти матбуот хизмати раҳбари Дайирбек Орунбековнинг аниқлик киритишича, қарз миқдори 58,8 миллион долларни ташкил этган ва у "яшил иқтисодиёт" лойиҳаларини амалга ошириш эвазига ҳисобдан чиқарилган.
Эрдоған 4 ноябрь куни давлат ташрифи билан Қирғизистонга келди. У 6 ноябрь куни Бишкекда бўлиб ўтадиган Туркий давлатлар ташкилоти саммитида иштирок этади. Йиғилишда Ўзбекистон президенти Шавкат Мирзиёев ҳам қатнашади.
