Таиланднинг жанубий ҳудудларида сўнгги 30 йил ичидага энг кучли сув тошқинлари кузатилмоқда, деб хабар қиляпти "Дунё" АА.
Бир неча кун давом этган кучли ёмғир оқибатида Таиланднинг 8 жанубий провинцияларининг кўплаб ҳудудларини сув босди, касалхоналар ёпилди, минглаб аҳоли ўз уйларини ташлаб кетишга мажбур бўлди. Ҳудудда транспорт, жумладан поездлар қатнови бутунлай издан чиқди.
Сув сатҳи 1,5 метргача кўтарилган Сонгкла провинциясининг барча 16 та туманлари табиий офат зоналари деб эълон қилинди. Мазкур ҳудудда 49 минг хонадон сув остида қолди ва 95 мингдан ортиқ одам жабр кўрди. 2 та фуқаро вафоти қайд этилди.
Таиланд метеорология департаменти маълумотларига кўра, тўфон ва тошқинлар яқин кунларда тўхтамайди. Қироллик шарқий ҳудудлари ҳам кучли муссон ва ёғингарчиликка тайёрланиши лозимлиги билдирилди.
Ўзбекистоннинг Бангкок шаҳридаги Бош консулхонаси табиий офат ҳудудидаги ватандошларимиз билан алоқада бўлиб турибди. Ёрдамга муҳтож фуқароларга мазкур ҳудудни тарк этиш, уларга тегишли ҳужжатлар расмийлаштириш бўйича консуллик-ҳуқуқий ёрдам кўрсатилмоқда.
