Прокуратуранинг фикрича, Хитой разведка хизматлари тайванлик собиқ ҳарбийларга қўпорувчилик фаолиятини молиялаштириш учун жами 90 минг доллардан ортиқ пул ўтказган
Тайван прокуратураси 7 нафар истеъфодаги ҳарбий зобитни Хитойдан пора қабул қилиш ва Пекиннинг сиёсий манфаатларини илгари суриш ҳамда оролга эҳтимолий босқин уюштирилган шароитда Хитой қўшинларини қўллаб-қувватлаш учун жангари гуруҳлар тузишни режалаштиришда айблади. Бу ҳақда Taipei Times нашри хабар берган.
Тергов маълумотларига кўра, гуруҳ раҳбари, 62 ёшли Тайван армия академияси битирувчиси Чу Хонжи бўлиб, у 2019 йилда Тайвандаги ҳарбий хизматдан истеъфога чиққач, Хитойга кетган ва у ерда Халқ озодлик армиясига офицер сифатида ёлланган.
Чу Тайванда жосуслик тармоғини ташкил этишга ва оролда Пекин манфаатларини илгари суришга қаратилган сиёсий фаолиятни бошлашга рози бўлган. У “Қайта тиклаш учун иттифоқ” партиясини тузди, унинг шиори “Хитой халқини қайта итклаш, барча халқлар учун тинчлик ва бахт улашиш” бўлган.
Прокурорларнинг фикрича, Хитой разведка идоралари унинг қўпорувчилик фаолиятини молиялаштириш, шу жумладан фаол ва истеъфодаги Тайван ҳарбийларини ёллаш ва хитойпараст сиёсий кучларни илгари суришни талаб қилиб, Чунинг ҳисобига жами 90 минг доллардан ортиқ пул ўтказган.
Ҳуқуқ-тартибот идоралари вакилларининг айтишича, гумонланувчилар снайперлар билан бирга жосуслик тармоқлари ва ҳарбийлаштирилган гуруҳларни, шунингдек, Тайванга хайрихоҳ амалдорлар ва сиёсатчиларни Хитой армияси бостириб кириши мумкин бўлган вақтда йўқ қилиш учун ҳарбий “ўлим гуруҳларини” ташкил этган.
Маълумки, Хитой бостириб киришидан хавотир олган Тайван ўз мудофаа қобилиятини кучайтиришга ҳаракат қилмоқда.
Абдуллоҳ Саййид
